آخر جواب بقلم مدحت رياض
يومها فاكر
كنت بكتبلك جواب
كل ما اكتب سطر
تنزل مني دمعة
اصله كان اخر جواب
كنت حاسس بالحروف
كان ليها صوت
كات بتقطع نبض قلبي
ايوة بتهز السكوت
عيني جات وسط المراية
شفت صورتك جوة مني
ايوة عينك كات معايا
فكرتني باللي فات
كنت فاكر ايوة وحدي
بس صحت ذكريات
زي اول مرة شفتك
زي دقات الساعات
لما تتاخر وظني
ولا شكلك وانت ماسكة
وردة مني
شابكة فيها لون ضفايرك
ولا ايدك لما ترعش
لما بنسلم ساعات
نظرة منك
رجعت كل الحاجات
وابتدت تتقل حروفي
لما زاد وياها خوفي
لما عينك تقرا مني
كل كلمة في الجواب
كنت هحكي ع الظروف
بس عندانة الحروف
كل حرف وجنبه دمعة
زي ما تكون النقط
والسطر سامعة
انه اخر حاجة بيننا
حبر فوق السطر دايب
ايوة كان العمر بيننا
وكنا اكتر من حبايب
بس لازم حد فينا
يبتدي بالخطوة يبعد
حتي لو هيقوله عنه
انه بايع ولا سايب
عدي وقت كتير وفات
من دقايق او ساعات
والجواب واقف زمانه
سطر واحد فيه حبيبتي
والقلم واقف مكانه
خايف اكتب؟؟
ايوة خايف
من عيونك لما تقرا
والشفايف
ايوة قطعت الورق
مرات كتير
كل ما اكتب كلمة الاقي
فيها جرح ولوم كبير
ابتدي في السطر تاني
اجي اذوق في الكلام
تهرب الفكرة اللي عندي
والمعاني
وارجع ابكي
والدموع تغلب كياني
وابتدي تاني الكتابة
ينطرح لون العتاب
عاوز ابسطها الحكاية
بس موش لايق كلامي
موش موصل للنهاية
ان ده اخر كلام
من روحي ليكي
واني موش هرسم سطوري
مرة تاني بلون عنيكي
وان لما يكون كلامي
بين ايديكي
يبقي كل الحب داب
اصل ده اخر جواب
التعليقات مغلقة.