آه يابلدنا …
أحمد كريم – مصر
آه يابلدنا يابنت الإيه
بسأل نفسى بحبك ليه
حُب ف قلبى قفلت عليه
يكونشي عشان اكمِنِّك بلدى
أهلى وناسى وبنتى وولدى
ولّا بحب تراب شوارعنا
اللى اتعلمت المَشى عليه
والله ماعارف اقول لك إيه
…..
لمّاانا كنت يامصر صُغَيّر
ويّا عيال الحتَّه باشابى
كنت قصَيَّر
كانوا يقولوا ده شبر ونُص
كنت أبُص
كنت أبُص في أرضِك وارسم
أى حاجات انا بحلم بيها
خطوه بخطوه عشان امشيها
أرسم عَلَمِك وارسم نيلِك
وأغنِّى لِك
وف مووايلِك
ياما سمعت حكاوى تزينِك
مانتى صبيَّه
والله مهما كبرتى صبيَّه
وامّا يقولوا يامصر تعبتى
برضُه تقومى وتبقى عفيَّه
آه يابهيَّه
عارفه يامصر بَحبِّك ليه
مش محتاجه أقول لِك ليه
مانتى الأرض..وانتي العرض
وانتي الحُضن
اللي كبرنا مابين جناحيه
آه يابلدنا يابنت الإيه
التعليقات مغلقة.