آيس كريم
قلم أسـمـاء الـبـيـطـار
في يوم نزلت أنا زوجي و الولاد نتمشي في وسط البلد
المهم روحنا نجيب آيس كريم فأخد رأي الولاد أنت طلبك ايه و انت و انتِ و جاب لكل واحد طلبه و في الأخر طلب واحدة رابعة
و قاله واحده مانجا على فراولة !
أنا بصيت حواليا أشوف مين معانا رابع ما فيش ؟!
و طبعاً أنا عارفه إنه استحاله ياكل حاجة في الشارع أو و هو ماشي
فبقوله : لمين دي قالي ليكِ !
فستغربت أكتر لأني مش بفضل الأتنين دول مع بعض ؟!
قولت له بس أنا مش بحبهم ؟!
قالي أنا بحبهم ؟!
موقف تاني ..
كان معزومين على العشاء
فزوج عمتي قال لها اعملي لها بسطرمة على رومي ؟!
أيوه نفس الأستغراب اللي حصل في الآيس كريم بالظبط !
موقف تالت ..
ولادي أو أي ولاد من الجيل ده اللي أكلهم محدود جدا جدا
ديماً تتحايل عليهم الأم إنهم حتى يدوقوا الحاجة لأن طعمها حلو فبيبقي نفسها حلاوتها توصل لهم هما كمان .
طبعاً مستنين الخلاصة زي كل مره
الخُلاصة ..
مش كل اللي بيفرض عليك حاجة يبقى متسلط أو أنت
ما لكش رأي أو شخصية أو نِفس أو ذوق إنه يسيبك تختار و تقرر
ساعات اللي قدامك بيبقى بيحبك لدرجة إن كل جميل و طيب بيحس بيه عوزك تجربة و الفرحة تنزل قلبك زي ما هو بيحس بيها .
يا ريت نقدر الناس اللي بيقولوا لنا نصايح أو بيفرضوا علينا حاجة
إن جاز التعبير من باب المحبة يا ريت نفهم الناس صح قبل ما نقرر عنهم حاجة أو نقول عليهم حاجة مش فيهم .
و على فكرة ..
المانجا على الفراولة طلعت فعلاً حلوة جداً
و كمان البسطرمة على الرومي .
موضوعك ده فكرني بأمي كانت دايما وهي بتاكل الفاكهه وتطلع مسكره وحلوة ديهاني او اي حد من اخواتي يكون جنبها… فعلا اللي بيحبك بيديك ديما الحاجه الحلوة… احسنتي