أبات أفكر فيك…كلمات أبومازن عبدالكافي .
زوجة غاب عنها زوجها تحدث نفسها واصفة مشاعر المعاناة في غياب الزوج الحبيب .
أبات أفكر فيك…كلمات أبومازن عبدالكافي .
حبيبي انا ف غربتك
مش عارفة أعمل أيه
حاسة بلوعة فراقك
وف قلبي نار تكويه
والصبر مر أوي
ماعدت قادرة عليه
أبات أفكر فيك وأتخيلك
وعنيا تيجي في عنيك
واتوه في دنيا ملامحك
وادوب في لمس إديك
واغرق في بحر غرامك
أرجوك تمد إديك
كتير ليالي طويلة
مابنامش م التفكير
وساعات حنيني وشوقي
بيخلوا دمعي يسيل
ومن التعب يغلب عنيا النوم
وقت بسيط وقليل
ألاقيك واقف لي تشاور
وتنادي بالمنديل
حبيبي قرب عليا
وامسح دموع الليل
د انا في بعدك حبيبي
عايشة يوماتي في ويل
افرد جناح الحنان
وضمني يا أمير
واخطف حبيبتك
ع الحصان الأبيض
بسرعة وطير
فجأة صحيت م النوم
على صوت صياح الديك
حلمي كأنه حقيقة
قمت بقول هلاقيك
لكن لاقيته سراب
يرضيك كده يا ديك
ادعيلي يرجع حبيبي
وانا م الخطر هحميك
ولا حد ياكلك محمر
أو حتى محشي فريك
وصل سلامي لحبيبي
مع صوت أدانك ياديك
وقوله ييجي أوام
وقوله فين أراضيك
ولو حبيبي رجع
أنا برضه هبقي اراضيك
خلص الكلام يا ديك
كلمات أبومازن عبد الكافي .
عبدالكافي فاروق عبدالكافي بدوي
التعليقات مغلقة.