” أبا العمدة ” بعلم الوصول بقلم/ زين ممدوح
مرزوق:بت يا جملات انت يا بت
جملات: نعمين يا سي مرزوق
مرزوق:المحروس ابنك فين،عايزه قوام
جملات:حاضر يا سي مرزوق، واد يا تامر، واد يا تامر كلم أبوك!
مرزوق بصوت منخفض:منك لله يا جملات حد برضه يسمي تامر، تقوليلي دا اسم كله مستقبل، طب هو فين!
تامر: نعم يابا
مرزوق:اسمعني كويس يا وله،آني باعت جواب تهنئة للعمده الكبير، الكفر كله بيعقد آماله عليك
تامر:يابا ملوش لزوم ،لا الجواب هيوصل ولا صوتنا مسموع
مرزوق:بس انت بطل لماضه، دا آني كل يوم بطلع في قناة الفرن،ولا انت مش شايف إلا تحت رجليك
وبعدين آني هبعته بعلم الوصول!،مع كلمة شكرا لساعي البريد على ضهر الظرف،بس إمسك الجواب الأول، شوفوا كده حلو ولا عايز تظبيط ، إمسك يا وله اقرأ وسمعني!
تامر: سيدي العمدة، السيد رئيس مجلس العمد،السادة رئيسي مجلس العمد،السادة نواب العمد
كل عام وأنتم بخير، كفر أبو السعد كله من أكبر راس لأصغرها،بيقولوا لكم ألف ألف شكر
إحنا الحمدلله كويسين طول ما أنتم بخير
والحمد لله كله تمام وعال العال ولا ينقصنا أيتها شيء
دا احنا بنلعب بالفلوس لعب في الكفر
وكله واحد له حساب واتنين
بس عند عم حسانين، بياخدوا شُكك،لحسن تفهموا غلط لسمح الله
اسيادنا العمد أهل الكفر كله مأمنيني أمانه ورسالة أوصلها لكم
أنتم كده مبسوطين، بركة لا تكونوا مبسوطين
ما تشغلوش بالكم بينا، الله موجود
مرزوق:بس يا وله كفاية كده اقفل الظرف
اجري أقوامك على البوستة،واوعى تنسى بعلم الوصول!!
التعليقات مغلقة.