أبسط قواعد النظام ـ قلم أسـمـاء الـبـيـطـار
بما إننا قاعدين في البيت الأيام دي ، و أكيد كلنا عندنا نفس العادات و و الموروث الثقافي عن أمهاتنا ، و كأنه روتين سنوي ، إننا بنعمل حملة نظافة شاملة لجميع أرجاء البيت قبل شهر رمضان !
و يمكن علشان نقوم بالحملة دي بنبدا قبل الشهر الفضيل بشهر كامل البيت حقيقي بيبقى في حالة طوارئ قصوى !
و تقريباً أغلبنا بيكتشف أماكن لأشياء كانت تايهه منه !
و بيخرج كمية فوارغ من برطمنات ، لكراتين ، لأكياس ، لـ ، لـ
و الغريبة إن بعد الإحتفاظ بهذه الأشياء كل هذه المده في الأخر مصيرها إلى التخلص !
مش عوزه أقول إحنا مهملين ، و مش عوزة أقول قلة فضي ،
أو يمكن كسل ، أو اليوم يا دووب بيكفي بالعافية أو ، أو .
لكن إللي أقدر أقوله إننا ما عندناش نقطة نظام .
يعني إيه ؟
يعني من أبسط قواعد النظام
إن كل حاجة تبقى في مكانها
إن كل حاجة يبقى لها تنظيف دوري مش من السنة للسنة !
على الأقل كل شهر مثلاً ، هنطلع نلمع النجف
الشهر اللي بعده نغسل حيطة اوضة واحدة .
المكتبة أو النيش يوم يكون عندنا أكل لتاني يوم ، أو سهرانين شوية بعد ما الولاد يناموا نرتبهم و نلمعهم و إحنا واقفين قدام التليفزيون .
المطبخ ..
و ما ادراكِ ما المطبخ ، حقيقي أسهل منه ما فيش لأن تقريباً يومنا أغلبه واقفين فيه .
يعني و أنتِ واقفه كده رتبي درج من الأدراج .
مره تانيه و أنت راجعه من السوق هاتي أي منظف للبتوجاز مش هياخد نص ساعة من وقتك .
و أنت بتجيبي كيس مكرونة اطلعي رصي الحاجة اللي الولاد غيروا مكانها مش هتاخدي خمس دقايق .
و هكذااااا .
لأن حقيقي الوقت ده من السنة ناس بتبقى مضغوطة جداً ، و مرهقة جداً جداً
و كمية المساحيق اللي بنستخدمها في فترة بسيطة ضغط إنفاق يمكن مايكونش متوفر وقتها .
أكيد عارفة في ناس هتقولي في ناس بتريح دماغها و بتجيب حد ينضف لها الشقة .
و ماله كل واحد ليه إمكانية ، أو ظروف صحية ، أو سن
لكن أغلبنا بيعمل بنفسه و بيشتغل بأيده .
و عن نفسي أنا واحدة من الناس اللي بعمل كل حاجة بأديا حتى لو بنتي ساعدتني في حاجة بعيد عليها .
الخلاصة ..
أبسط قواعد النظام ..
زي ما قولنا إن كل حاجة تبقى في مكانها، و ليها تنظيف دوري .
هتلاقي نفسك في أيام زي دي يا دووب حاجة بسيطة اللي بتعمليها
و أكيد فترة زي دي و الكل قاعد معانا في البيت و عارفين طبعاً إن معظم الرجال لا يطيقون مثل هذه الأشياء .
و منعاً للمشاكل و العصبية لأن أكيد عندهم حق .
يبقى من الأول نـقـطـة نـظـام مش أكتر .
التعليقات مغلقة.