أبطال أكتوبر …بقلم مدحت رياض
طب قولي ازاي
فكرت العالم بوجودك
ليكون نساي
شقيت في الصخر
بمجهودك
وبقلبك جاي
أساطير عن جيشهم
نشروها
مليانة بخوف
وإيمانك كان هو سلاحك
خلاك بتشوف
إن اللي في أرضك متداري
ده جبان وخسيس
وان أنت إن مت على ترابك
في الجنة عريس
شديت من عزمك واخواتك
بالإيد في الإيد
عديتوا الصعب واصراركم
كان نار بتزيد
بطولات بالدم كتبتوها
على أرض النور
وبايدكم علمتوا الدنيا
في تاريخ مسطور
ان اللي بيغصب أراضينا
هيجيله الدور
يهرب من جيشنا أما يشوفه
ويبات مكسور
علمك بيرفرف في العالي
وف كل أوان
من سينا لمطروح يا بلدنا
ولنيل أسوان
ع العهد يا بلدي وهنصونك
والكل جنود
ولا اسمك يتمس بكلمة
والحق يعود
من نيلك شريان في قلوبنا
بالخير بيجود
في السلم غصون زيتون اخضر
والحرب اسود
التعليقات مغلقة.