أبيض أسود ورمادي …بقلم وحيدعلى الجمال

أبيض أسود و رمادي
أنا أبسط إنسان هتقابله
بيقضي حياته كدا عادي
لا ببص لغيري و اتمنى
و لا بحقد أبدا و أتشفى
و القرش في ايدي بيوجعني
مصروف و لا يدخل حصالة
أنا باكل مِش من الزلعه
و اتعشى باتيه ويه زبادي
و كرسبي فراخ مع نجيرسكوا
و الكفته من عند الحاتي
و صوابع محشي ما اقولكشي
و العدس بصاره مع نابت
أنا خلف خلاف كدا و بعاند
أنا عمري ما أزعق في ولادي
في الأصل حاسبهم أصحابي
و صعيدي في طابعي و بنداري
و بناتي عينيه و حياتي
و الواد متربي على الهادي
و الشعر في حكم اللي حاببها
في الأصل و ذاته كلام فاضي
متدين جدا و فلاتي
كلامنجي و بس ماتتخضش
ما تروحشي بعيد و لا تتصور
بحكيلك عن وقت شبابي
بتوضى كتير أنا من ذنبي
و بدمعي أنا بغسل كدا روحي
مابحبش أطول أحزاني
و ملامحي كلها على وشي
الخالق الناطق كدا أمي
ماهي توأم روحي و أفعالي
لو حتى غلط كدا في حقي
راح أطيب خاطرك و هاسمحك
من غير ما تقدم أعذارك
ماهي فترة و كلنا هنراوحه
ليه نزعل بس و نتخاصم
على دنيا ماتسواش ابدا
خالص تتساوى
بنعلك ومداسك