أبين زين ….
شعر جيهان النجار
أبين زين واوشوشني
واصارح نفسي وادوشني
فينكسف الودع ويشوف
خطوط متكعبلة فى كفوف
يبص ف وشى وفى ايدى
يجيب وجعى وتنهيدى
أتارى الحظ على روح الألم ملفوف
يخلى عنده حبة دم
يقول ياواد ياحظ اتلم
ولا فيه كسوف
فى سكة سفري لعيونك
واخدني لفين أبين زين
وبقرا القلب قبل العين
ابين كل شئ مجهول
واقوله لنفسي قبل م أى حد يقول
بلاش الحب أصل الحب
مش معمول لامثالك وله ناسه
ومحناش من مقام حضرة جناب سيدنا إحساسه
بلاش انا قولتلك نوبتين
ابين زين
ومكتبولي على جبينى
مانيش سالمة
فى دولة حبك الظالمه
أعيش وكأنى م الكراكيب
وفاكرة نفسي م المحاسيب
اتاري العشق مالكني ورافض إنه يعتقنى
أنا مملوكة صدقنى
ومش راضي لقلبي يسيب
وانا من قلبى محرومة
ما ليش فيا ولا أيتها معلومة
ولو مرة أحس بشوق لأحلامى
أفوق على خبطة من شومة بإيد وسواس
وتقسم عمرى إلى نصين
ابين زين
أبين زين ومش شايفة
لأنى بجد والله العظيم خايفة
لأن الحب عاوز قلب له وحده
انا قلبى على ناصية يطل على الأمل لكن
يلاقى اليأس ع الجهتين
أبين زين
….
التعليقات مغلقة.