“أب ديت ” بقلم وحيد علي الجمال

انسخ من قلبك كذا نسخة
و أعمل تحديث للي جمعته
و اللي أنت في عمرك
ضيعته من غير تثبيت
إفتكر الحلم اللي حفظته
و أعمله ريسرش
من غير ما يهنج
و يبطأ على الإنترنت
ظبط أحداثه المختلفة
و أعمل باسورد
و إعادة ضبط من المصنع
مع نسخة جديدة و أصلية
من غير ما تزود
و لا صوره تبقى فوتوشوب
بعد أما تصفي في أوجاعه
و ترتب صلته بأعدائه
و أصحابه كمان مع أحبابه
و تحدد مين منهم باعه
اعمل للنسخة الموجودة
مع كل الصور المهزوزة
إلغاء و دليت
قلبك رايح يرجع مِتْصين
فابريكة من غير ما يحمل
و لا يشكي دموعه و يتنيل
على جرح قديم
رجع بياناتك من تاني
و أحذف في مشاعر مركونة
ملهاش و لا نجمة في ايكونة
و اعمل أب ديت
مع سوفت لكل اللي كاتبته
أو مرة غلطت و صدقته
من غير ما تدور عن أصله
و تجمع تاني في عناصره
هتلاقي قلبك و لوحده
استرجع نفسه مع نفسه
بقى كله جديد
هتعيش اللحظة في أحلامك
من غير تهييس و تصدق
شغل المهابيل
راح تعمل من قلبك صفحة
قابلة التحديث
لا هتشكي همومك من تاني
و تقول يا موغيث
راح يشطب كل اللي هيدخل
و يحاول يكذب ويألف
كدا في التفاصيل
هتريح عقلك مع نفسك
كدا م التشويش
كل اللي هيدخل في حياتك
معروف من قبل مايتفرمت
أو يدخل حالة تسطيب
و برمز حماية مش أكتر
راح تمنع كل اللي يفكر
يدخل و يضايق في سعادتك
و لا عمر إيديك ما هتتوسخ
بقلوب في طباعها و أفعالها
تشبه في ردودها و أفعالها
جواليص الطين الحمضانة
الذوق ما بيعرف كدا بابها
جنسها مخلوق من حاجة
تانية أبدا في سلوكها
و أفعالهم مش بني آدمين