أحـلى خِــلـقــة شــوفـتـهـا
محمد المصيلحي عودة
يوم الميلاد واللي جرى .
كان يوم رهيب مليان خطر
لكن بفضل الله أقول .. ربك ستر
كان يوم نهاية .. ويوم بداية ..
ويوم مواجهة .. ويوم ما عمره ف بال خطر
كان يوم حقيقي معتبر
واهو جيت خلاص .. وبقيت أنا بينكم نفر .
شوفوا الخلاص يا من حضر
دكتور دا واللا شيخ خفر ؟!
شايلني بالمقلوب ورجلي هتتكسر !!
طب ليه بتضرب ؟! ..
… دا انت شكلك محترم .. ما ترضاهاش
مش عيب عليك ؟ … كلك نظر
راجع بتضرب بالقوي ؟
خليك ظريف .. وبلاش كدا
صرّخت .. فرحوا .. وزغرتوا .
الناس دي مالها مدهـولـة بالشكل دا ؟
غطي اللي نايمة والنبي .. يادي الكسوف .
شدي الغطا بشويش عليها م الحروف ..
ما تخضهاش
دي احلى خلقة شوفتها ..
.. وانا لسه بتهجى المناظر .. والعيون بتشوف طشاش
حب العرق لولي مزوق وشها .
وريحتها شداني قوي ما بنسهاش
ودوني حبة عندها .. حبة كمان
حطت شفايفها على خدي بحـنان .
حسيت بنبضة قـلبها شـلال أمان
نفس الموسيقى .. كنت بسبح جنبها أيام زمان .
كل الأيادي بلهفة بتقلبني …. اييييييه ؟
والدم ده على جسمي ليه ؟
هو احنا كنا في معركة ؟ … ماسكيني ليه ؟
طب انتو مين ؟
اللي بتمسح جبهتي بإيدها الشمال
واللي بتفتح هدمتي بإيدها اليمين
وانا عيني ع الحلوة اللي نايمة تبص لي بأحلى عنين
وعنيها شداني لها من غير إيدين
بصيت لها .. ضحكت .. ونامت مرهقة .
نوم العوافي للأميرة اللي مانامت من يومين
ودوني نمت ف حضنها
ونعست على صوت الحنين .. لما لقيتني في الأمان
نفس الموسيقى ..
.. كنت بسبح جنبها .. أيــام زمــااااااااان
التعليقات مغلقة.