أحن قلب
بقلم ..مدحت رياض
كان حضنه بيطيب جراح
كان يبتسم تلقي الامل
فوق سكتي فارد جناح
علمني إيه معني الكلام
علمني أرسم من عيونه
ألف سكة للسلام
علمني احضن الف قلب
ومرتضيش أبدًا لجام
يحبس خطاوي محبتي.
أو مرة ياخد سكتي
ناحية حرام
من نظرته معني السماح
تبدأ مع الفجر الوليد
لون افتتاح
لليوم بضحكة ع الفطور
صوت الندا في البيت يدور
حنيته أشبه باوراق الزهور
من طلته ع الغصن
بتغني الطيور
وف شدته
أجمل معاني رقته
وف علو صوته
كان بيظهر بين حروف
حنيته
يزعل بقسوة جوة منها
توب حرير
ومكانش بيطول كتير
كات إيده بتطبطب
علي دفة امل.
فالموج يسير
والمركبة تعدي الشطوط
واليوم يفوت
واستني من تاني الندا!
أستني من صوته الندا
من ندهة بستني الرضا
غايب سنين
وما بين حواري الروح
أدور ع الصدي
علمني إيه معني الكلام
بهدوء غريب
كان ناسي بس يقولي حاجة
تتعمل لما يغيب
لما الظنون في الناس تخيب
وقت أما شعر العمر
في الأيام يشيب
صدقني موتك بعد منه
ألف موت
ساعة الفطور مبقاش بينده
أي صوت
وأنا توهة واخداني السنين
بين ده. وده
وأما بحس إن الرياح
شدت قلوع المركبة
بستني ع الشط البعيد
صوت الندا
يا أحن قلب احتاجتله
طول الزمن
حنيته شلال بيغسل
كل حزني والجراح
من غير تمن
من غير ما يسأل ليه وفين
كان صبر بيعدي السنين
يضحك وجواه يختفي
كل الألم
يضحك وميهمش
ولو حتي انظلم
علمني ايه معني الحياة
من أول السطر ابتدي
وأنا كل يوم جوايا ليه
مليون ندا
يا خسارة موش بسمع جواب
بيرد بس علي الكلام
صوت الصدي
التعليقات مغلقة.