أخر رحلتي بقلم..مدحت رياض
كل اللي كنت تحبهم
مبقاش وجودك جنبهم
يحيي اللي مات
العمر فات
وانت اللي متعلق
على غصون الأمل
وعامل لي قال
زي الجبال
ده البدر مرة بيكتمل
وبسرعة يتحول هلال
ويغيب ساعات وسط الغيوم
صعب أن قلبك يبتسم
والحال يدوم
كل اللي كنت تحبهم
مبقتش لحظة قربهم
ضمن الحاجات المذهلة
والمشكلة
انت انت مجبور تبتسم
أو تترسم
زي اللي كنت عليه زمان
القلب شاب قبل الأوان
مبقاش يساع
بين عزم جرحك والأمل
فيه عمر ضاع
افتح في ألبوم الحياة
شوف مين ملامحه اتأثرت
مين جوة منك ليه تمن
مين صورته فجأة اتكسرت
واحسب صحابك بالسند
موش بس زفة وهي لفة
تحسها كمالة عدد
موش وقفة بتصد السنين
لو مرة مالت واشتكيت
مين يبقى جنبك في الفرح
ويمد ايده ان يوم بكيت
كل اللي كنت تحبهم
نزلوا في محطات الزمن
اخدوه قرار
متقولش مين خاين
ومين كان مؤتمن
المشكلة في الاختيار
كل اللي كنت تحبهم
مبقتش حتى تحبهم
ولا حتى ذاتك نفسها
والدنيا اصلا كلها
بقى طولها يشبه عرضها
ولازم تفوق
مستني ايه من أهلها
لازم تدوق
طعم الجراح ولا اكتفيت
بص في مرايتك صدفةُ
هتقول ياريت
لو مرة يرجع لي الزمن
ومكنش انا في نفس الظروف
وساعات بحس بالف خوف
ان الزمن موش وحده
ده معاه القدر
ميفيدش فيه ابدًا حذر
فهسيبها للي يحلها
خالق سماها وارضها
يحسن ختامي في قصتيي
ويكون معايا في شدتي
وان فجأة خلصت رحلتي
يرزقني جنة بعرضها
يرزقني جنة بعرضها
التعليقات مغلقة.