أرض الانبيا…بقلم اشرف الشناوي …شاعر عاميه البرامون -المنصوره
دباديب
فتافيت
وعيال بالكوم
تحت الانقاض
وادي ايد
بتعافر لجل ماتطلع
تاني تعيش
وادي بنت جميله
في حضن
رغيف العيش
وادي عيل لسه
مشفش النور
الدم في غزه
بيملا بحور
صواريخ ودانات
بتقش في لحظه الدور
والعالم ساكت
واخرس
مابينطقش
والكل خلاص مستني
نتيجة الماتش
مستني بيان الملكه
تسيب العرش
وكلاب على باب القصر
بتنهش في الحراس
اه ياعالم ميت
والا مفيش احساس
قتلوا العصافير
علشان بتطير
وتغني بلحن الحريه
رسموا الاحلام
زرعوا الألغام
على أرض داستها
الانبيا
وحصان طرواده
اهو جاي م البحر
وادي غزه بتنده
عالملايين من شهر
دباديب ولعب
وعيال أحلامها بتتبعتر
والصبح يعدي
يرش القبر بزعتر
والفجر بيرمي النور
من غير مايعبر
مانعين الحلم يعدي
كمان م المعبر
والعالم ساكت
مابينطقش
ولا حتى بيفكر
ياضمير العالم
امتي هتبقي مذكر
دبابيب فتافيت
وضفاير بنت جميله
الكل بيشرب من دمها
وبيسكر
……………
التعليقات مغلقة.