أشواق كلمات محمد سيوفي

أشواق كلمات محمد سيوفي

يا حب يا غالي
شاغلي بالي
فيه كل آمالي
وماليني بالهنا
.
بحبك بقالي
يا عمري ليالي
وحبك كأنه
من قبل ١٠٠سنه
.
بحبك لأنك
بقيمتك وسنك
عايشه كإنك
ملاك م السما
.
يا سمره يا زينه
يا ورد الجنينه
يا حلم بيكبر
في قلبي أنا
.
بحبك وخايف
عشان قلبي عارف
مشاعرك وقلبك
مش ملكي أنا
.
بحبك لوحدي
في قربي وبعدي
واتمني سعادتك
لو مش معايا أنا
.
بتسعدني رؤيتك
وبعشق ضحتك
واكون في خدمتك
ده كل المنى
.
واتوه وسط الزحام
أسهر أنا ما انام
وتنام عيونك إنتي
ويتعذب قلبي أنا
.
أعد نجوم الليل
صاحبي ورفيقي الويل
وإنتي في دنيا تانيه
غرقانه في الهنا
.
أنا عارف حلمي صعب
لكنك أغلى قلب
وعارف مستحيل
هتكوني ليا أنا
.
إحنا في الحلم واحد
لكن مش قلب واحد
شوفي مين قلبه دايب
هتلاقي قلبي أنا
.
ده خوفي عليكي
وشوقي إليكي
وحب العمر كله
مش قد حبي أنا
.
أنا مش طمعان في قلبك
ولا انتظرت حبك
لكن رضاكي عني
يملاني بالهنا
.
وكل شيء نصيب
تهجر تبعد تغيب
هيفضل اللهيب
بيزيد في قلبي أنا
.
بحبك يا روحي
يا بلسم جروحي
يا سر سعادتي
ومنايا أنا