أعراض الحب
بقلم إبراهيم الشرقاوي
أعراض الحب
جبت سلاح و عملت كمين
علشان أعرف جاى لى منين
كل ما عينى تشوفها ف مره
قلبى يولع شوق و حنين
طب ليه هيا مصرة الحرب
و أنا قلبى الغلبان مسكين
يمكن علشان لونه رمادى
و اللا عشان بيدق أنين
إن فكرت مكلمهاش
تتعارك فيا الشرايين
و إن لمست بإيديها إيديا
يغمى عليا أنا يوم و إثنين
هو الحب يا يبقى بياتى
أو نهاوند و صبا و حزين
و اللا الحب دا كلمه جميله
كل حروفها يادوب حرفين
همشى و أسيبها
لو أعذبها
لو هابعد عنها لسنتين
يمكن أخف و يرتاح قلبى
و أعرف أنام لو يوم ساعتين
بردوا تجينى ف قلب الحلم
ماسكة لى مشرط أو سكين
قلت كابوس و خلاص و هطنش
هأنسى و أعيش و هأفوق بعدين
أسمع صوت بيقوللي بعينك
و لا يوم و لا شهر و لا شهرين
قلت أشوف دكتور يعالجنى
يمكن أبسط حاجه يفيدنى
رد عليا بكل بساطه
رد جميل بس معقدنى
قاللى خلاص ياجميل حبتها
تطلع تجرى و تطلب إيدها
قلت له و إن معملتش حاجه
قاللي هقوللك ع التفاصيل
تبدأ نوبة دق بقلبك
تلقى عزولك دايما غالبك
يجرى الدم ف قلب وريدك
فوق و لتحت شمال و يمين
يعلى عليك الضغط ف لحظه
تتعب عينك تبقي ضرير
و إبقى قابلنى إن دقت الأكل
أو جسمك يقبل محاليل
صرخت بِغِل و قلت حرام
انا اموت أرحم لى و لا أبقي ذليل
بص الباشا و هو بيبكي
قاللي ف جمله بسيطه مريحه
أوعى تصدق حد بيحكى
أو بيقول الحب ده راحه
مين ياحبيبى إتجوز فينا
و عاش من غير طب و لا جراحه
مين إتجوز مرة و عاش
أو مندمش و قالها صراحة
التعليقات مغلقة.