ألبوم الذكريات ( الذكرى الرابعة – جمبري عادل إمام )

بقلم سامح خير

مطعم مؤمن بتاع السندوتشات فتح فى اسكندرية فى اوائل التسعينات وقت ما كانت سموحة لسة فاضية و رايقة نسبياً .

المطعم دة ليه كام ذكرى كدة ححكيهلكم النهاردة …

فى أولى ثانوي رُحت اذاكر عند واحد صاحبي ( محمد عاطف ) و طبعاً و لا كنا بنذاكر و لا بتاع ، فلقيته قالي تعال ننزل نروح ناكل عند مؤمن.
أنا : يا عم أنا لسة متغدي من شوية و مش عايز آكل .
عاطف : و لا أنا جعان أصلاً، بس تعال حنعمل نمرة هناك و حتنبسط ..
المهم نزلت انا و عاطف من رشدي أخدنا تاكسي و وصلنا عند مؤمن و دخل هو يعمل الأوردر و كان مطعم مؤمن زمان اول ما فتح بيسأل على اسم صاحب الطلب عشان لما يخلص ينادوا فى الميكروفون على الاسم عشان ييجي يستلمه…
موظف الكاشير بتاع مؤمن بيسأل عاطف : اسم حضرتك؟
لقيت عاطف بكل ثقة : عادل إمام .
الراجل ابتسم و كتب الاسم و انا بقول لعاطف ايه يا ابنى الهبل دة ؟
عاطف : أتقل و حتشوف النمرة اللي جية دي .
بعد 10 دقايق الراجل بينادي فى الميكروفون : أ. عادل إمام و طبعاً عاطف عامل مش سامع عشان الراجل ينادي على الاسم تاني.
الراجل كل ما ينادي على الاسم الناس تقعد تبص حواليها مستنيين عادل امام يظهر لغاية ما عاطف لقى الناس اللي فى الشارع داخلة تدور على عادل إمام فأعلن عن نفسه و الناس طبعاً فهمت النمرة و قلبت ضحك جوة المكان كله!
مش عايز أقولكم ان اللعبة عجبتني و تقمصنا شخصيات كتير بعد كدة ( أحمد زكى، محمود عبد العزيز و غيرهم …)

الموقف التانى كان بعد الجواز… فى يوم من ذات الأيام، نفسنا هفتنا أنا و مراتي نجيب دليڤري من مؤمن و أيام زمان مكنش فيه Applications تطلب منها و الطريقة الوحيدة كانت انك تكلم المطعم و تديله الاوردر بالتليفون … قعدنا ندور على رقم المطعم و مش لاقيينوه و كانت
أسهل حاجة عشان تجيب نمرة اي مطعم زمان قبل ما الانترنت يبقى على الموبايلات، أنك كنت تكلم دليل التليفون على رقم 140 .

المهم انا ضربت رقم الدليل عشان أجيب رقم مطعم مؤمن و فى حالة من اللاوعى تخيلت أني بكلم المطعم …

أنا : مساء الخير … لو سمحت عايز اتنين جمبري و اتنين سبيط
موظف الدليل بإستنكار : نعم حضرتك ؟!!
أنا : بقولك عايز سندوتشين جمبري و اتنين سبيط من غير ميونيز .
الموظف فى ذهول : معلش واضح اني مسمعتش كويس !
أنا و أنا لسة مش مجمع أني بكلم الدليل : بقولك اتنين جمبري و اتنين سبيط و متحُطش ميونيز …خد العنوان بقى.
الموظف : حضرتك فى حاجة غلط .
أنا : مش فاهمك… مفيش حد بتاع دليڤري النهاردة ولا ايه؟
الموظف : الموظف و هو ماسك نفسه مش عايز يقل أدبه عشان المكالمة مسجلة : ايوة معندناش دليڤري يا فندم لأن أحنا دليل التليفونات 140 !!!
أنا و انا حاسس بكوباية مياة ساقعة اتدلقت على قفايا بس فى نفس الوقت قلبت معايا بهستيريا ضحك : يا أخي و الله أنا اسف على اللخبطة دي بس على فكرة ممكن تكلم المسئوليين لو يقدروا يضيفوا الخدمة دي، حتلعب معاكم.
الموظف و هو بيجز على سنانه : حاضر يا فندم ، حنبلغ المسئوليين باقتراح حضرتك العظيم دة ..
أنا من كتر ما عمال أضحك مقدرتش أسأل الراجل على رقم تليفون مطعم مؤمن و قفلت و كلمت واحد تاني ..

انت فين يا عاطف

عادل إمام

مؤمن

جمبري سبيط