ألف وش شعر وحيد علي الجمال سرس الليان محافظة المنوفية جمهورية مصر العربية
وش ضهر وضهر وش
لما يبقى الحق ضايع
والحقيقه بألف وِش
كل أحلامك باعوها
وانت مش قادر تنِش
حبل كذبك انقطع
لما كان بينا وِكَش
بعد منك روحت أصلِّي
راح جَمِعنا تاني صف
انسرق جوايا بكره
وانشرب قبلينا مِش
والتسامح كان لشهر
والتصالح كله قهر
والعدد كان كله غِش
اقرا كف وابني عِش
انفخ الصمت اللي ساكن
جوه منك
الغفير لِسَّاتُه خايف
برضه منك
الغفير بقى عنده كِرش
خلي نفسك فيك تفِش
عَلِّي صوتك بالصراخ
خَوِّف الديك والفراخ
لسه عندك فجر طالع
بَعدُه ميت مليون صباح
اوعى تحلف باللي راح
يوم ما عَلِّينا الفَلاح
خدنا بعد النوم مُخَالصه
روحنا سَلِّمنا السلاح
لسه واقف في المواجهة
جبهتك شايله الكِفاح
انت أنكرت الحقيقة
واللي بينا كان سِفاح
جَهِزوا ورق المحاكمة
امنعوا عنه البراح
هما رهنوا البيت زمان
والسفر كان أصلُه فرض
باعه منه واشتراه
رغم إنه كان معاه
حقه منه كان محبة
والسداد بقى حبة حبة
رغم إن الميه حاضرة
التيمم في المحاضرة
سُنَّة مكتوبة لفرض
شِد راسك بالإشارب
الصداع قافل عينيه
تقولشي كان داخل في حرب
سَلِّم الشيخ الإمامة
لِف نُص الشال عمامة
واللي فاضل كان كمامة
اوعى تنسى تكون راسملك
فوق جبينك كام علامة
شالوا نعشُه باستهانه
أصله كان عايش في كرب
لأ.. مَهانة
نمنم الحرف المنمنم
خلي جرحك فيك يعلم
مهما سِنك عدى منك
لسه شايفاك المعلم والمسمسم
معزة ماشية ف قلب لَم
لما شافني قالي شِم
نفسي مرة يبقى عندك
أي دم
التعليقات مغلقة.