ألواح مرسومة…ألواح زي السكر عبير عبدالمنعم
الواح مرسومة
واطارها برجلين
ماشيه ومش مفهومة
الوانها ملايين
سريالي ،تجريدي
كلاسيكي، تنقيطي
تحتار فيها العين
الواح وعجيبة
مالهاش تركيبة
كدابة حبابة أو حتى
ضدين..
بطيابه تتغنى
تفاسيرها تتأنى
تقلانة ع الفرشة
والوانها غايبين
مطارحها بتطرحها
تضربها وتجمعها
وتقسمها نصين
ويبان المتخبي
من دمع ومتعبي
من غدر ومتربي
وبتشوفه بالعين
الواح مزيكا
تتكلم بولوتيكا
أو عظمة تنسيكا
عيوبها لو الفين
اللوحة بتتزين
علشان لوح بيبين
الود في سطرين
تلقاها وتلقاه
الوانهم ياه ياه
وحقيقة جواهم
ممسوخة بوشين
الواح مرسومة
انواع مختومة
عارفة حدودها وتلقى
في اطرها ماشيين
ألوالح مرسومة
بالصدق بتتسمى
بالكدب بتتغمى
لكن مش عارفين
فاكرنها بتتلون
بالحب وتتكون
أتاريها في الدنيا
تايهين وغايبين
الواح زي السكر
تانية مر وحنضل
ومرارها ضعفين
الواح مرسومة
لكن مش مفهومة
وادي احنا رايحين
التعليقات مغلقة.