أمك ثم أمك…شعر مسعد البحراوي
يوم ميلادها ويوم ميلادي
كانوا في حالة تضاد
يومها ممسوح من حياتها
ويومي دايما عيد ميلاد
وبغبائي عشت عادي
خدت ياما منها طيبه
والعجيبه..
كنت بهْديها السُهاد.
وقت لما الدنيا تقرص
كنت بتشعلق في جيدها
تبعد الخوف عن خيالي
وتعاملني كأني سيدها
وبرضاها
تِفتل الشمعه وتقيدها كل شمعه تقيد في عمري تنطفي شمعه ف حياتها…
ياللي وياك لسه أمك
بنصحك تسجد في ايدها
قول لها دايما بحبك
عبي إحساسها ف وريدها
كل دقه جوه قلبك
،مافي غيرها هيجاوبها
يابني أمك
ثم أمك
ثم أمك
لو راحت فمنين تجيبها؟!
اوعي أيامك تغرك
أو تقولك مره سيبها
أو حياتك يوم تجرك
تنسى رجليها وترابها
كل أركان العباده جوه أمك
والحنان أول عبيدها
يابني أمك دي حكايه من حكايات الزمن
ورتك في عنيها صورتك وانت حاكم للوطن
التراب أواب لأمرك
والنجوم زينه ف جبينك
حاكم الحكام في عصرك
معتصم على جمر دينك
ورتك إن إنت يوسف
في الجمال مالك وصيف
جملت طعم الحلال
حتى لو لقمة رغيف
وانت عيل كنت زينة الرجال
وإنت راجل كنت عيلها الضعيف
وانت أب كانت الأم لولادك
كانت البركه لزادك.. كانت الجو اللطيف
يابني أمك ثم أمك ثم أمك
من غير أمك
والله يا بني في الحياه ها تعيش كفيف
التعليقات مغلقة.