أمك عَفِيَّه…
حسن أبو عرب
أمك عَفِيَّه
مش قُلتِى يا مَّه
انك بقيتى كويِّسَه
وانِّك جبل رِيح الزمَن
أبداً لا يمكن تهزِمِك
طُول عُمرى
شَايفِك مدرَسَه
بتعلِّمِى كل البشر
تِغزِل ضفاير دا النهَار
وطريق خُطَاهُم
بالإيمان هَيقَدِمِك
مش قُلتِى دُول خَبِة هوا
وَاهُو دُور وماشى والسلام
أُمَّك عفِيَّه يوَاد تمام
دا البَرد لو قَتَل الكلام
احذر رِيَاحُه تسَمِّمَك
برد الغَلَا والمُوج شديد
محتاج لعزم يكون حديد
يا ابنى وضنايا اياك تحِيد
مهما يِجِيك أو يِألِمَك
متخافشِى دا امَّك دى وَتَد
تِمرَض.. تقُوم
الكل بيها بيتسَنَد
يكفيكى شر حسُود حَسَد
يا ابن البلد :
أُمَّك مدد
إن يوم غِلِطت تِعَلِّمَك
وتفهِمَك معنى الوطن
معنى السكَن
وازاى تكون قَد المِحَن
أُمك يَوَاد بتخاف عليك
ف عنِيهَا والنِنِّى تدارِيك
وان بِعتِهَا راح تشتِرِيك
وتعَادِى كل اللى يعَادِيك
جِوَّه ترابها تلَملِمَك
وان يوم حاولت تكون وضيع
ونسيت جِمِيلهَا والصَنِيع
على صخرَهَا هَتحَطَمَك وتهَشِّمَك !!
التعليقات مغلقة.