أم إبراهيم
مايسة إمام
أم إبراهيم جارتنا
صرخت فى يوم فزعتنا
هِمْ ياجدع الْحَق يا أخينا
كله مـ الفزع جِري علينا
قلنا قامت في بيتها حريقة ؟!
ولا حرامي نهب سرِيقة؟!
لكن الحقيقة… مش حريقة
ولا قدر نفذ في دقيقة……
اتاري جُوَّه الحارة عَرْكة
حَبِّة شنبات عاملين فتوات
مستقويين ..باللمة.. والفكة
فاردين قلوعهم عـ الخلايق
وَسَّع.. يا صعلوك مـ السِّكة
لَـ يدهسوك ……ويفرموك
وتروح ضحية ..في الدَّبَكَة
ولا ليك ثمن ولا ليك دِيَّة
ماهي محبوكة ..كدا حبكة
وكل الحارة ملمومة للفرجة
مشخصاتية ….مطبلاتية
للعركة نبطشية…….
وأهي سبوبة … كدا قشطة
وكام حرفوش كتكوت منتوش
من غير ريش …مستني يغني
اسم الله عليه لفتوة الحتة
أم إبراهيم تصرخ تهاتي
واد ياإبراهيم يازينة الحتة
روح نادي أبوك وأخوك
سيبوكم من الفتة……..
شوفوا الحرامي الأراري …
عامل علينا قال إيه.. جِتَّه
قال نِهِيبة …وعَبِّي في زكيبة
لا ليها صاحب.. ولا حارس
ولا حد يقوله : … مين أنت ؟
واد ياابراهيم هات بن عمك
وياك يكون سندك :
ياما بن عمي مين ؟!نسيتي؟!
نسيتي عماليه وكام حركة؟!!
اسمع ياواد :
سيب كله سيب
بينا غريب
إيدك في إيد اخوك على بن عمك
وايدك في ايد بن عمك على الغريب
التعليقات مغلقة.