أم الشهيد كلمات : أبومازن عبد الكافي

أم الشهيد كلمات : أبومازن عبد الكافي

آهٍ وآهين
ياقلب أمك
يا كبد أمك
خلاص ياوليدي
رحت خلاص؟!
خلاص..
مش رح تعود تاني؟!
وبين درعاتي..
تتهنى بأحضاني!!
توطي تبوس ياواد إيدي
ويعلى النبض في وريدي
أوطي أبوس على راسك
وإيدي تفوت على شَعرك
يشوكها..
عشان حالق ومتظبط..
وكاوي هدومك الميري
وبتودعنا .. يا أميري
تقولي ادعيلي يا أمي
وأرد .. أنا كلي بدعيلك
وهو انا حيلتي بس مين
غير انت واخوك يانور العين
وحتة بت مفعوصة
تقول بوصة ؟!
بتشبط فيك وكات حاسة
ليلة ما سافرت بعد العيد
بتعيط ..
بس في المرة دي بحرارة
وخرجت تجري ع الحارة
تشاور لك ..
تقول باي باي
كانت حاسة ..
بإنك يا بني في المرة دي ..
مش راجع .. ومنتاش جاي
وانا واقفة ..
أبص عليك من الشباك
وقلبي يدق وبسرعة ..
في نفسه يفط ييجي معاك
وقِلة حيلتي منعاني
وأقول أصبر على بعادك
مادام من أجل أوطاني
وآه وآهين .. وآه ياني
ليلتها .. النوم ولا جاني
وحاسة بخنقة في صدري
وجاني كابوس وأنا صاحية
فقلت شيطان ..
وقمت بسرعة واتوضيت
رفعت إديا لك ودعيت
وأنا بدعي .. جاني هاتف
بإنك في السما .. حليت
دموعي تسيل على خدي
وأنا واقفة وبدعي يارب
وقلت يارب ان خدته ؟؟
تصبرني.. وترضيني..
يارب .. يارب.. يارحمن
و إنت رحيم وإنت كريم
تثبتي على الإيمان
وأعيش وأموت على ديني
أنا عارفة .. بإنه شهيد
أكيد عندك هيبقى سعيد
لكن صعب الفراق يارب
دا برضة حتة من روحي
وهو النبض في قلبي
وهو دوايا لجروحي
وهوَّ .. كل شيء عندي
فصبرني .. ورضِّيني
وقوي إرادتي ويقيني
يارب انا لذت بجنابك
يارب وقفت ف رحابك
وبطلب .. إني اشوفه يارب
أشوفه يارب في منامي
واضمة كتير لأحضاني
واشوفة في جنتك فرحان
في صحبة خير .. مع العدنان
أمانة يارب .. أمنية
ورافعة لك أهو إديَّا
ووافقة ع المصلية
حزينة ودمعي ف عنيه
أمانة يارب .. ورجائي
تنولها لي يا حنان..
أشوفه يارب في الجنة
وامَلِّى من ضِيا نوره
قليبي وروحي وعنيّا
دعيت .. يااارب

أنا فعلا
خلاص يامَّه
منيش راجع
لكن في الجنة ..
أنا فرحان أنا راتع
ويوم الدين ..
هشفع ليكي ولابويا
وحتى لأختي وأخويا
كمان سبعين من أهلي
أنا يامَّه ..
عزيز وكريم على ربي
بِحَمدِ الله .. يا أمي
قومي اتوضي كده وسمي
دا عمره ماراح هدر دمي
و ربي مطلع وشهيد
وهو اختارني عنده شهيد
أعيش في نعيم ويرزقني
ما انا ممتش ..
أنا في الجنة يامه حي
ويوم الدين قُريِّب جي
ونتقابل ونتهني
بعيشة هنية في الجنة
عشان خاطري
كفاية بُكا .. كفاية دموع
وقولي لقلبك الموجوع
خلاص ياقلبي .. إطمن
سلامي يا أمي لأبويا
سلامي لأختي وأخويا
سلامي كمان لكل الناس
في حتتنا ..
وكل جيرانا و اصحابي
وعيلتنا ..
و ماتنسيش ..
ضروري كمان سلام يامّه..
لكل عساكر الدفعة ..
في كتيبتنا …
ضروري يا أمي هايجولك
يعزوكي .. يباركولك
ماهو يوم العزا لشهيد
بيبقى فرحه في الجنة
وبيزفوه ملايكة ربنا
لسبعين ..
من الحور عين
سلام يامَّه ..
سلام يامَّه ..
سلام يامَّه

يا قلبي .. خلاص
خلاص أهو قالك ابنفسه
ياقلبي افرح بأه
مش اطمنت منه خلاص
أنا عارفة .. فراقه صعب
دا هو الحب والإحساس
لكن برضه .. لازم ياقلبي
تفرح له .. وترضى كمان!!
بكل يقين مع الإيمان
دا قدره ياقلبي ونصيبه
بإنه يكون فدا بلده
وإنه يكون .. شرف للكل ..
ومن أعلى مكانة يِطُل
ويلا ادعي كده معايا
كفاية الآه و آه ياني
وقول يارب..
يارب اقتص م الجاني
يقضي حياته بيعاني
ولا يفرح بها ولايوم
وف الدنيا وف الآخرة
يكون عبرة لكل الخلق
وِيِتْعَذَّبْ في دنيتنا
ودار الحق
ماهو انت العدل
وانت الحق

خلاص ياقلبي ..
أيوه خلاص
ويلا افرح وزغرط له
وقول للناس ..
انا ابني مماتش
انا ابني حي
انا ابني .. شهيد
انا ابني حي
أنا ابني ..
عند ربه.. سعيد
أنا ابني حي
أنا ابني حي
أنا ابني حي