أنا أمك
بقلم أحمد كريم
صحيت بالليل وانا نايم
على صوتها
أنا اتخضيت
أنا أمى سنين فاتت على موتها
وكان بيتنا ده غير البيت
قالت لى ياواد ماتتخضش
هُوَّ انت لِسَّه ياواد بتخاف؟!
ورجليك وانت نايم لِسَّه
بتشوط اللحاف!!
أنا أُمَّك
أنا الحُضن اللى كان فى التُّوهَه
بيضُمَّك
أنا أُمَّك
سنين العُمر قَضِّيتها
باشيل همَّك
وكنت تيجى لى بدموعك
وأمسحها بكَفِّينى
تسيب كَفَّك على خَدِّى يدَفِّينى
وترمى عندى أحمالَك
وأوِّل كلمه اقولهالك
ولايهمَّك
أنا أُمَّك
أنا الليلة دى جايَّه لَك
وعندى جُوَّه قلبى عتاب
أنا من بعد ماسيبتَك
بقيت حاسَّه
كأنَّك ماشى فى العَتمَه
وحُضن العَتمَه بيضُمَّك
كَأنَّك لِسَّه ماكبرتش
ولا اتعلمت م الدُّنيا
كأن العُمر مامشيشى
ولا خَدشى الزمان منك
أنا زعلانه مش منك
أنا خايفه عليك مِنَّك
سنين العُمر ياولدى
ماباقياشى
وقطر العُمر ياولدى
خلاص ماشى
ياتلحق قبل مايفوتَك
يا إما تصحَى من نومَك
ماتلقاشى
وراح الصوت بعيد عنى
وانا باندَه ما سامعاشى
ولِسَّه الكلمه فى ودانى
يا تلحق قبل ما يفوتَك
يا إما تصحَى من نومَك
ما تلقاشي
التعليقات مغلقة.