أنا الإنسان
خالد الشيشينى
وعايش فيَّا إحساسي….بحُب الخير
وزارع نبض إخلاصي….بأرض الغير
ونفسي الدنيا دى تفرح
وأفسّر فرحها وأشرح
لأحبابي..في كل مكان
وأنا اللي ْفَرحتي غايبه
بتبعد عنِّي مش سايبه
ولا فرحه تقربلي
ولو هتجيني في الأحلام
وتوهبلي السَّعادة كلام
هقول كسبان
م أنا الماضي في وصل أمانه
ع الطيبه
ولا فكرت يوم أجرح
وأغرَّق روحي ف الغيبه
وفارد روحي صفصافه
وخوَّافه
على كل القلوب ترجع
ف وقت الفرح
مغلوبه
وأنا الانسان
ومش لاقي لزماني مكان
نهار الدنيا متبدِّل
مالوش في العافية و القوَّه
وليلها الساحر السهران
صَبَح دبلان
ومش هوَّه
مفتَّح عيني مش شايف
وفين الصبر دُكَّانُه؟؟
شراع المركبه المايل
علي كتف الزمن خانه!!!
وقطْر الحظ كان هدَّى
فقام عدَّى
وفاتلي نصيبي…. دُخَّانُه!!!
وأنا اللي بينحِلف بيَّه
وصافي وصادق النيَّه
وعامل للنصيب خاطر
و فاتح صدري للأيام
ودايما علي الجراح شاطر
و بَطلَع برضوو في الآخر
أنا الخسران ؟؟!!
أنا نفسي أكون غيرى
وأغيَّر فيَّا تفكيري
وأقدِّم نَفسي من نِفسي
علي نَفسي اللي كات عايشه
بتوب إنسان
وأكسَّر رقبة الأخزان
علي حلمي اللي مش طايلُه
أو أرسم ضحكه بالألوان
علي الحِمل اللي أنا شايلُه
عشان الدنيا بصراحه
تعبت وهيَّا مرتاحه
تعبت معاها م الاخر
عشان إنسان
عشان عايش بتوب أبيض
مفيش ولا نقطه فيه سوده
عشان عايش حياتي بجد
و عارف إن مهما تطول
ليالي العمر معدوده
وحب الناس ملازمني
وصوت الحق هازمني
وإيدى للي ظالمني
بكل الحب ممدوده
عشان داء المثاليَّه
عشان الصَّح والمفروض
وده جايز،، وده مرفوض
وميصحش يكون ليَّه
ورغم إنِّي حاولت كتير
أغَيَّرني
وألوِّن روحي بالألوان
فمقدرتش أكون غيري
بكل صراحة معرفتش
أكون إنسان بدون إنسان
بكل صراحة معرفتش
أكون غير إنّ أكون
إنسااان
التعليقات مغلقة.