أنا الجاني شعر حمادة ريحان
ولما رجعت من تاني لبستاني
لقيت أزهاري دبلانه وبتعاني
و أنا الجاني
و مجني عليا من نفسي
نسيت أمسي …
فضاع مني شروق شمسي
و مات حسي …
وبهتت كل ألواني
لا عدت أشبه في يوم جني
ولا أتصنف مع الإنسي
كما المنسي ف زمن تاني
أبص لنفسي في مرايتي
أشوف صورتي
ألاقي في عيني من حيرتي
دمعة قهر هداني .. وزيداني
ألم مشفوع برسم خضوع
لحزن القلب الموجوع
اشكي وصوتي مش مسموع
مانيش قادر …
أخبي في عيني أحزاني
فتدميني الدموع علي طول
يروح نظري كما يعقوب
مافيش عندي أمل موصول
يصبرني علي المكتوب
مانيش معدود ولا محسوب
ولا بشبه نبي ورسول
مانيش أيوب …
جبال الصبر منه تدوب
ولا بملك عصا موسي
ولا دعوة مسيح مصلوب
مانيش يونس في بطن الحوت
بحس بموت …
ومش قادر اطلع صوت
كإن ايديا خنقاني ..
ومنعاني ماقولشي الآه
وحتي الآه لو اتقالت
ألاقي دمعتي سالت
وحفرت في الخدود مجري
بدون مادرا
بفقد حتي القدرة
بإني امسح
دمعة حزن خايناني
وفايتاني ..
في عرض البحر وحداني
مانيش بحار ولا غواص
تعبت خلاص من الاخلاص
وكل الدنيا خيناني
مانيش عفريت في وسط الغيط
ولا حتي خيال ع الحيط
في وسط الضلمة بشبه خيط
في توب اسود ماهوش باين
ماهوش خاين ..
لكنه اتساب وبيعاني .
مانيش درويش من الدراويش
ولا من شلة الحرافيش
ماتسألنيش…
عن الصور اللي في البراويز
بقت عواجيز بدون تمييز
ملامحي خلاص ماتشبهنيش
بقت تشبه واحد تاني
وانا الجاني
ومجني عليا من نفسي
فضاع يومي وضاع امسي
وضاع مني شروق شمسي
وانا الجاني
التعليقات مغلقة.