أنا الحريف …بقلم وحيدعلى الجمال

و كان واضح أوي كدبك
و باين حتى على وشك
و رغم الكدب صدقتك
مشاعري في قصتك صعبة
و مش سهل إن أروضها
بكلمة حب مغصوبة
تبرر هجري في خصامك
ولو شُفتي في يوم قلبي
في قلبك لسه متكعبل
متتخضيش
دا انا ماشي و بطوح
من الكسرة
و ماسك دمعة الخذلان
ساعتها قلبي كان صايم
و ممنوع الكلام عنه
و صورتك لسه محفورة
على صدري
و نارك قبضه في جفوني
و مثبوتة في محضر
جنحة التزيف بأحلامك
هبيع الصدق بالتخريف
و مش هاسمح ضميرك
تاني يوجعني
بحرض نفسي كام مرة
على بُعدك
و بتشعبط في حبل
وصالك الدايب
بجيب م الوهم كام ضحكة
في بعدك عني تسندني
تخض الروح تطمعني
و لما الكدب وسوسلي
حاولت أكتب قصيدة
بحرها زيادة
فموج البحر كذبني
حلفت عليه ما يفضحني
أنا مهزوم و بزيادة
و مش قادر أصدقني
تعبت كتير من التمثيل
و نايمة دموعي فوق خدي
بتمنع خوفي يسبقني
فيهزمني وانا لسه بعالج
نفسي م الطيبه وم التغفيل
أنا الأصلي مش التزيف
أنا الممنوع من التحريف
أنا آخر لقب واخده
في أوهامك
أنا الحريف…