أنا الغلطان بقلم / تهاني بركات
أنا راضية أكون جرحك
وليّا في قلبك كذا علامة
و راضية كمان أكون ضعفك
و وسط دموعك أنا حكاية
بتحكيها مرة بشوق
و ميت مرة تكون جارحة
تكون كاتبة ليّا الموت
أنا المركب المكسور
و جنيّة في وسط بحور
و برديّة في تابوت مهجور
و أسيرة و أميرة معاها الحور
أنا الكاهن ،، أنا الساحر
أنا المسحور
بتكتبني و ترسمني
و ترجع تاني تحذفني
و أنا في قلبك وجع محفور
سنين عدت
على قصوري فاتهدت
لكن راضية عشان ليّا
في قلبك بيت
أنا عمري ما استغنيت
و قلبي يقولي ايه يعني
تيجي في حلمي
توعدني ،، تفرحني
و تبنيلي في وسط الخوف
قصر أمان
و ايه يعني تنساني و تبيعني
و وسط الفرح تجرحني
و أنا في بعدك ما ليش سلطان
غريبة الدنيا و عجيبة
تقربني و تبعدني
و وسط الموج على شطي
تكون غرقان
على شطك بنيت قصري
و من رمله دويت جرحي
و في الآخر رميت قلبي
و قلت أنا ندمان
بلهفة شوقي لكلامك
تمرر فيا أحلامك
و صدى صوتك
يزودلي عطش روحي
و يرجع قلبي و يقولي
و ايه يعني أكون غلطان
أنا الغلطان…..
التعليقات مغلقة.