أنا المفتون وأنا المجنون.. بقلم سامح الأطير
انا المفتون وانا المجنون..
بخصلة شعر مرسومة علي جبينك
انا المعجون بلون النيل..
وسمار الفخر من طينك
وانا العاشق لنور البدر ف عيونك..
وبكره فيا تأثيرك
يا جبروتك،في ساعة قسوة ترميني..
علي شوكك بطول ايدك
وينزف جرحي قدامك..
ولا بسمع ندا صوتك
وفجأة تقومي وخداني وضماني..
بحضن الأم واشكيلك
من الغربة، من الضربة..
ومن تعبي وموتي في ميادينك
من الآهه،وصوت الظلم جوايا..
وشكي في موازينك
ساعات بحس ان انا فهمك..
وانور ليكي قناديلك
وبرده العتمة تندهلي
وتظهرلي شياطينك..
يزيد الرعب جوايا
متعمليش كدا معايا..
مش ذنبي ان انا عاشقك..
وواحد من مريدينك
انا بكره ضعفي قدامك..
وقلة حيلتي ف غرامك
وصوتي اللي مش مسموع..
وبعشق فيا تقديرك
تتوه السكة من رجلي وانا يجري..
وبلقط نفسي مش عارف،ولا شايف
غير صورة بهته قدامي..
لا باين فيها الوانها،ولا واضحة تعابيرك
بحبك أيوة منكرشي،ومقدرشي..
يغيب عشقك ولا لحظة ..مينفعشي
وآااااااه لو تسمعي صوتي
لما آجي أنادي وأحكيلك..
عن هم شايله جوايا..
وقصة كبيرة وحكايه
عن قلبي اللي صار مقسوم..
مابين قسوة بخاف منها
وحنية بتسري في شرايينك
انا منك، ومين غيري راح يشيل همك..
ودا مني مهوش تقصير ولا منك
ولكن لما احن اليكي..
بتبعدني وتمنعني تماثيلك
واتوه ف بحرك الآسي..
ويعلا الموج لفوق راسي
لا انا عارف افضل كدا سايبك ..
ولا عارف أعديلك
التعليقات مغلقة.