أنا درويش …
بقلم وحيد على الجمال
( أنا درويش )
غراب واقف و حدايه
و شمس الظهر محبوسه
على قد السطوح نازله
تزغلل عيني بمرايه
أنا باصص على شجرة
خيالها يشبه العذرا
و ماسكه في ايدها
تفاحة و منجايه
و هربان العرق عندي
كأن الضل تاه مني
و كل شويه يعصرني
و يفردني
و كان ناقص يفتشني
و يحلف إنه من حزني
مانش واقف معاك تاني
مدام رسمك على صدري
و باقي الوشم في دراعي
و بغزل فيكي أبياتي
قصيدتك خرجه من دمي
و وزن الحب مش عادي
نسيت في الحر عنواني
و صعب الحر ينساني
لقيت البحر غار مني
و كان شايل كمان مني
جرحت عنيه فشدتني
حاولت أهرب فثبتني
فقلت أكتب فكذبني
رميت الصمت حددني
و لما فرحت طمني
طلعت بجد مش فاهم
على دمع الشكوك عايم
بشوفك مرة و أنا صاحي
و طول الليل و أنا نايم
بقيت فاطر و أنا صايم
وخدنى الوعد للتأكيد
على زنزانه بابها حديد
فروحت بعيد
أحدد للهوى مواعيد
لقيت عشاق هناك قبلي
بيشكوا الليل على صبري
و صبري هناك مابيجيش
أنا قاعد بقول لسه
و ماسك دقني بإيديا
بزق الفرح في قلوبنا
و افضي الباقي في دولابنا
و أقلب صفحة الحواديت
ورغم الموت أنا عايش
و لسه هاعيش
و هصرخ جوه أحلامي
كما الدرويش
ماهما قالوا عليا زمان
دا عقله مافيش
و كان كله بيتفتش
و أنا ممنوع من التفتيش
أنا صليت
و في غيابك صلاتي قصر
أنا عمري ما نمت العصر
و لما الفجر مدنشي
صليت العشا حاضر
و متأخر عن التوقيت
لقيت الحصة ملغية
و مقتولة في قلب الفصل
حاولت أهرب من الخضه
وم التهويش
سألني فين بقى رخصك
ضحكت و قلت يا باشا
أنا ممنوع من التفتيش
أنا درويش
وحيد علي الجمال
جمهورية مصر العربية / المنوفية / سرس الليان
التعليقات مغلقة.