أنا ده ممكن…
مسعد البحراوي
أنا ده ممكن
أنا لما أقول عن روحي شاعر
أبقى أكيد عقلي اتصاب بجنون
أنا جايز اكون
إنسان بيداعب حلم مجاش
بحروف معصوره من التفكير
فيبان لك شعر.
أنا يمكن اكون بهرب م الدنيا
ف بيت موزون بطلوع الروح
أنا يمكن لوح م اللي اتجنن
واشترى بِجّْماله جَمال ليلى
والكلمه دي هي اللي تحسن
نبضات القلب المتتاليه
بكتب تخاريف
وظريف ممكن
لكن لا انا شاعر ولافنان
أنا من غير دول إنسان أصلاً
والشعر شعور وطنه الوجدان
لكن إذا كان مؤمن طبعاً
أنا جايز اكون ككتاب مفتوح
مفضوح بحروف كان لها قيمه
عنوان مكتوب وتاريخ ممسوح
أعماله بتُعرض في السيـما
ومالوش فيها دور
ويقول أحسن
جايز ممكن علشان طيب
والنبض مآمن بالعشاق
بشتاق للمعنى اللي يطبطب
على قلبي فبطرحه ع الأوراق
فضفضه وخلاص.
أو ممكن اكون إنسان واضح
ووضوحي غريب على طبع الناس
باين خايف
مش عارف أفرح أو أحزن…
فبداري ملامحي ف كراسي
كاسي الفاضي من كتر الشرب
سكرت هويت
فبنيت القافيه ف وسط البيت
صبيت المعنى بإحساسي
ع الحرف فكسرت الإتيكيت
مانا واد فلاح
ملّاح الأرض وعنصرها
فازاي يستعصى عليَّ الحرف
واهُو طرْح ومن ضمن جذورها
وبَكوّْن بيه الحال والظرف.
بعدلْ بُــ البال المتعكنن
أنا مش فنان
انا ده ممكن
فلنرجوا من الساده الأشراف
إنصاف الإحساس ع المظهر
لانا غاوي غرورا كما قلتم
أنا طبعي صريح مش بتمنظر
أنا مش فنان ولا عاوز اكون
غير في عيون بس اللي يحسوا
مش شايف نفسي أنا بيكاسو
ولا أفقه شئ عن أهل الفن
على إيه هتغر
فاسكتوا أحسن
إذا كان ممكن
حرفي بيكتب نفسه بنفسه
يوم عن يوم نفسه بتتحسن
مسعد البحراوي
التعليقات مغلقة.