أنا فيكي ضيف… بقلم هنا سعد
بحبك يا دنيا قدك انتِ
بطولك وعرضك بدوب فيكي دوب
كرهتك يا دنيا برضة قدك انتِ
بغشك وزيفك عنك هَتوب
حبيتك حقيقي وبرضه كرهتك
عايش فيكي انازع كأني غريب
بحبك لأنك قدري ونصيبي
اجيلك واعيشك واتعلق بناسك
كرهتك لإنك فانية وغرورة
تخونى حبيبك اللى فيكى ماسك
بحبك لانك هبة ربي ليا
عطية كريم أعيش فيكي ناسك
كرهتك لانك غرورة وزيف
مهما عمرى طال انا فيكي ضيف
اجرى عشانك اسابق وحوش
مهما بقيت مصيري أبقي طيف
أشرّق أغرّب وأتنفس نهارك
يقرب منى ليلك يحسسني بخوف
اجري ف حضنك واتدارى فيكي
يشوكنى حضنك ويطعنى سيف
اخيرا فهمتك
اخيرا كشفتك
احنا فيكي وقت
بين قوس وقوس
جينا ليكي نزرع
ونحيي نفوس
نحوش عملنا
مش تحويش فلوس
نذاكر كويس عشان الامتحان
ربك ودينك ومالك وعملك
أهم الدروس
تواضع لربك وبين العباد
ما ينفعش تمشي مابينهم طاووس
ما ينفعش تظلم وتقسى
ما ينفعش تجرح و عالقلوب تدوس
صباحك عبادة
ومساك عبادة
والاستغفار طقوس
ما ينفعش تكونى يا دنيا ف قلوبنا
ولا حتى ينفع تكوني عدوة
الرضا ده ديننا ما نسخطش فيكي
والعيش يشبع لو من غير غموس
البركة بتسري فى القليل فيكبر
وبكرة احنا نكبر ونبقي دروس
وبعده نسيبك والعمر يخلص
نتباهى بعملنا وطهارة النفوس
التعليقات مغلقة.