أنا قــــررت…بقلم معوض حلمي
أنا روحت الوحده الصحيه
فسألني طبيب الورديه
عن سر زيارتي ف هذا الوقت
وانا وقتي ماهوش ملك إيديا
والشعر مسيطر على حالتي
وأناحالتي صحيح مستعصيه
باصحى الصبحيه ف نص الليل
وبانام بالليل في الضهريه
ووصفلي الدوا إني اتمشى
مع وحي الفكره ونتعشى
ونبيع القافيه بحبة فول
والشطره بتورة طعميه
وإياك تتمـنظر بكـلامك
وتقول للناس إنك شاعر
بيسرسب إحسـاسه مشاعر
والشاعر بيشحت في المعنى
لاجل يبان للناس حساس
مثلا يعني
بيكون بيكلم في مراته
ويشاغل في وداد ع الخاص
ومـراته بتـحلف بحـياته
ويحلف هو على الإخلاص
ألفين شكل ف وش الشاعر
مقنع جدا في الحوارات
جوا البيت مشغول مش شاعر
رايق جداً في الصالونات
بره البيت لو شوفته رمانسي
عايق في البدله الكاروهات
في التصاوير موجود مش منسي
بين مسعوده وبين حسنات
ولـذلك أنـا قـــررت
أقـعـد مـع روحـي شـويه
وأبت في ذات هذا الموضوع
وخلصت بأني أقول ممنوع
إني أشارك في الصالونات
والنـدوات الغـير مـجديه
وإني أشوف النافع ليا
ولإبداعي
وإن القيمه تكون الداعي
وتنميلي ف عقلي الواعي
لاجل مااشد شراعي واعدي
واهرب من وسط الألغاز
هبـد ورزع ونغـمه نشاز
واقعد بيني وبين أفكاري
واعمل من أنوارهم كاري
واملى حواري الناس حواديت
وازرع من إشعاري الغيط
ويا خيوط الفجر الطله
والقى حروفي سنابل هله
جايبه حصاد الدور زغاريد
واملى قلوب الناس بقصايد
واقعد ع المصطبه وياهم
واحكم بينهم وابقى محايد
والعـب سيـجا واتحـداهم
وامشي معاهم في الأفراح
واشـرح لمتابعـيني سـيرتهم
وابقى مداوي لأي جراح
وابقى الحاوي واجيب ضحكتهم
عن صحبتهم واحكي حكاوي
عن نسمتهم لو يوم مروا
ننده بعض وكلنا غاوي
نسرح ع العربيه الكارو
بين الزرع ف أرض العوده
يسمعوا مني الشعر العامي
وتحلى القعده ونسمع عوده
تحت الساقيه وتوتة عمي
ويزول همي ف حضن اللمه
والحكمه ام الـسـر خـطـير
أجمل من صالونات البندر
من غير الروج والمانيكير
في الريف تتحالى وتتغندر
ولـذلك أنـا قـــررت
أقعد مع روحي شويه
وأبت في ذات هذا الموضوع
وخلصت بأني أقول ممنوع
إني أشارك في الصالونات
والنـدوات الغـير مـجديه
وإني أشوف النافع ليا
ولإبداعي
وإن القيمه تكون الداعي
وتنميلي ف عقلي الواعي
وتنميلي ف عقلي الواعي
بقلمي الفلاح الفصيح
معوض حلمي علي
منشأة بطاش
تمي الأمديد / دقهليه
التعليقات مغلقة.