أنا مجنون شعر وحيد علي الجمال سرس الليان محافظة المنوفية جمهورية مصر العربية
بَحِب الشِعر وكتابته
وانام واصحى على سيرته
بحِبُه ف حُبُه وف غيرته
وفي عتابه
وادوب وامسح في أعتابه
ولو أهل الهوى تابوا
هزيد منه كمان واشرب
ساعات ببقى كما البلسم
كتير بغضب كمان واشتم
بنادي الكلب في وشه
واردد ع الملأ اسمه
ولو هَوهَو..
بحط الجزمه في خشمه
وقطمُه مش شبه نحتُه
وبَفضل أقِل في راحتُه
لحد مصيبه ما تاخده
يا إما يموت
ما انا مجنون
بقول حكمه وأقول فكرة
وبحكي عن حاجات تانية
ساعات ماضي
وساعات ذكرى
بغيب وارجع
كأني لوحدي في الملكوت
بشوف في الضلمة أحلامي
واشوف الموت
واكون الكون دهو بتاعي
بعيش باشا واعيش هلفوت
ومش بسكت عن المسكوت
ف متلومشي على مجنون
بعيش بكره مع امبارح
وبرسم حلمي بالشقلوب
وكل حياتي بالمقلوب
بطعم الذل متحني
وجوَّه القهر مستني
بشوف الناس سواسيه
بطير وامشي على الميه
ولو مُيت مليش ديه
وجوَّه الناس أنا محبوس
بشوف نفسي مع نفسي
كأني كابوس
بنام واضحك
وكل كلامي بالمحسوس
مليش حد ومنش محدود
هرب خوفي ومش موجود
ومش بعمل مكانه لحد
ولا يمكن بتهديده أخاف واتهد
ومرفوع القلم عني
وذنبي ايوه في حقك
ملوش توبه.. مهوش مكتوب
فمتكرمشي ف فلوسك
وتقفل بُقي بنفوذك
هزيد في العند وهدوسك
وهحكي ع اللي انا شُفتُه
وفي الدفتر مهوش موجود
ومش هسكت عن المسكوت
هنادي الكل مش هسكت
واخلي الكل راح يكتب
ومن كتر ما هو معبي
ولاجل الشعر ما يعدي
هيكتب إن انا مجنون
ما انا اصلا مانيش مجنون
بعيش اليوم على قدي
وكله برضُه بيعدي
وباب القبر باب واحد
مهوش فيلا ولا بلكون
هنتحاسب.. وفيه ناجح
وفيه راسب
وكله في الصحف مكتوب
فعملك هوه تحويشتك
بلاش بيها تكون مفتون
فراجع بقي ذاتك
اذا هانت عليك نفسك
على كل البشر بتهون
التعليقات مغلقة.