أنا وقلمي …
مدحت رياض
حضرة جناب المحترم
قلمي الحزين
مين فينا حقه يلوم في مين؟
مين خلى من لحظة عتاب
انهار دموع
مين كل مرة في سكتي
يقفل في أبواب الرجوع
مين في الالم يبري الحروف
مين في الفرح يهرب بخوف
مين استخبى في حضن مين؟؟
ولا انت مخنوق بين صوابعي
الدبلانين
مجبور وحبرك صار أسير
وقيود كتير
قفلت منافذ فرحتك ..بتسكتك
ودموعها تفرش سكتك
وكأن قلبي باب سطوح
الذكريات
يتخبى فيه كل الحاجات
اوقات بحس في صمتنا
بالحبر مات
دايما تفكر في اللي فات
وتعيد في صوت كل الجروح
وان مرة جات سكة فرح
حبرك يروح
وتقولي حاسس بالكلام
ده مفيهش روح
وتشوفلي جرح يشدني
وانا بنحني
قدام عذاب قلب أنكسر
قوم بكتبه
والجرح يتسرسب لقلبي
يعذبه
وكأن انا عنوان حزين
لرواية وبطلها اتنسى
أو نهر فياض بالأسى
أو قلب بيوزع حنين
والدمع عنوان الكرم
حضرة جناب المحترم
مين فينا حقه يلوم في مين؟؟
التعليقات مغلقة.