أنا وكرشي أنا صايم…شعر وحيد علي الجمال
صحيت بدري
م أنا بدري بكون صاحي
لقيت كرشي كاسر نفسي
مابين زوجتي واولادي
طلع في دماغي اروح اجري
واجيب حقي وبدراعي
يا إما كرشي يهزمني
يا إما انجح وبكفاحي
واشوف نفسي
كما شوفتك
بلملم كل أحزاني
وأحقق أغلي أحلامي
أسد ماشي مهوش محني
بهز الدنيا بجناحي
لا بشكي من تعب ضهري
ولا بصرخ بأوجاعي
ولا بسمع لي صوت رُكَبِي
وتزييقها
واجز كتير على سناني
ولا بنهج وانا طالع
على السلم
ولا بَلقُف في أنفاسي
وكل الناس بتحسدني
على رُفعي
وكام عضلة على دراعي
وكتفي أه مع صدري
أنا رياضي مهوش عادي
راح البس كل شيء فاتني
ومنسي جوه في دولابي
وهخرج كل يوم اجري
أنا في الچيم وصحابي
هكچول لبسي واتدلع
ولارج صمول على الاخر
هيبقى النادي جار بيتنا
ويبقى زيتنا في دقيقنا
وساعة الأكل أنا القاضي
ماكنتش اعرف ان احنا
بإهملنا في صحتنا
خسرنا أحلا أيامنا وأوقاتنا
ندِمنا بس بزيادة
خلاص بُكره أنا هبدأ
وأدِب نفسي بصيامي
جرام الأكل راح يفرق
حماسي يشد إخلاصي
فتحت الباب لقيت محشي
خدتني الرعشة واللهفة
وفرحة قلبي م الدهشة
وقلت لنفسي.. أنا صيام
لاقيت كرشي رما نفسه
خَطَف م الحلة مِيت صابع
سحرني بطعمُه جنني
لقيت نفسي بقيت عايم
عاتبتُه بعنف أكدلي
أكيد بُكره أنا صايم
على دا الحال سنين عدت
وكرشي مرة يوعدني
ومرة يقول مانيش صايم
وحيد علي الجمال
سرس الليان محافظة المنوفية جمهورية مصر العربية
التعليقات مغلقة.