أنين…واترسم فوق الجبين شعر منى فهمي
بداية الحكايه
بتتولد ويانا صرخه
تهز جدران الحياه
وبعدها بنعيش ب ويل
موصول ب اااااااه
برانا مرسومه ابتسامه
وجوانا بركان هموم
يهدر ب خوف
متغربين
والوحده تقتل ف النفوس
100 الف صوت
نجري ندور ع الطريق
وتنطفي شمعة شبابنا
تسحبنا دوامة الظروف
وانكتب علينا نحزن
واترسم فوق الجبين
تجاعيد بتحكي ع السنين
تايهين
تقلت حمولنا
متسلسلين
بقيد من نار
ب ننهار
و الحلق مرر
من اسي طعم الحكاوي
حتي الغناوي اتحرشجت
وسكتنا وبيحكي الانين
وسنين
تمر
واحنا م الكسره نعاني
جوانا سيل م الاسئله
والنهايه
كل الاماني مش ممكنه
متمكنه
منا الظروف
قتلت كمان احلي مافينا
واخر الحكايه
الهم كرمش ف الوشوش
وشيبنا خلاص قبل الاوان
احزان
باهته صورنا ع الحيطان
وصوت اذان
وياه عيون ب تبكي
وصوت يهمس
انتوا ف قلوبنا
مهما مرت الايام علينا
وفاتحه
واتقفل الكتاب
التعليقات مغلقة.