أهم الأخبار بقلم : رضا أبو الغيط
ف مجلة بتصدر
كل صباح
عن دار الفجر اللى ما شفتوش
من يوم ما أملنا نعيش ف أمان
ساب دارنا وفات ف قلوبنا جراح
الشمس بتكتب للقراء
مليون موضوع
بدموع معصوبة بألف وشاح
وعلى القراء
وحدها تختار
الصفحة اللى بتشرح أخبار
أطفال بتموت
ف سواد الليل
م الخوف والجوع
وتملي تشوف الناس أشباح
وكمان تختار تعرف أخبار
الحوت اللي بيبلع أسماك
حلمها مدفون بين الشطين
من يوم ما الناس
نسيت حطين وصلاح الدين !
والدٌَين بقى هَم بلون الطين
بيفرق بين قلب الأخين
وبيقلب طعم الفرحة نواح
وعليها كمان
تلمح تصاوير أعداء الخير
بين الصفحات
فرحانة ف طير كان حلمه بسيط.
مصلوب فوق سور صفحات الزور
علشان بيقول إننا أموات
والوحدة خلاص صبحت فنكوش
والعدل ضرير بيعيش سواح
ف مجلة بتصدر
كل صباح
عن دار الفجر اللى ما عمروش
باع شرفه عشان عشرين ملطوش
أو حتى عشان
يقطف كام بوسة من التفاح
الشمس بتكتب للقراء
مليون موضوع
بدموع بتسابق أي رياح
وعلى القراء تدفن أشلاء
العجز اللى مكتف دراعات
سيفها البتار
ومخلي الليل يسقيها الويل
ليل ويا نهار
وكأني الليل أصبح ريٌَاح
وعلى القراء تصحى من النوم
لو عاوزه تكون عنوان مفهوم
يتصدر كل أخبار الكون
وتحل اللغز اللي بيشغل
عقل الملايين
ومخلي الناس تمشي بوشوش
مليانة رتوش
مش شايفة براح
التعليقات مغلقة.