أوبرا عايده بقلم خالد عاطف أبو العزم
لم يعد بإمكاننا التوقف عن السماع .. سددنا الآذانَ .. فعزفت القلوبُ .. نشازاً .
على الشروق عداد ..
ف آخرُه الغروب .
نكتب .. بإيدنا ..
- الظلم مش مكتوب – .
البخت .. عَبْد ..
اللى اشتراه ظالم .
وصَدَقَه .. لمّا نواسى ف المغلوب
كيلو الدهب زى الصفيح .. كيلو
اتنين سيان .. ع الكفَّه مايميلوا
يشيل فقير كيلو الصفيح .. يجرى
أمّا الدهب .. يتشال .. ولا يشيلُه
فاضل فى قلبى ضحكه .. على نفسى
خبّيتها من قمرى ومن شمسى
ماهوش كسوف ..
بالعكس .. اقولها ب فخر
أهى ضحكه تنفع لمّا احس بقهر
وف وقت ما اتنّكِد تسلّينى
الله عليكى لو تطاوعينى
وتشيلى ضحكه ..
أبقا مش وَحدى .
تدعى عليّا تقولى : ..
ياوغدى .
إلهى اشوفك طير ومتكتف
مرصوص عليك الريش ومتستَّف
كان مالى انا بالضحك وقت الهم ؟
ليه تبتلينى ياعديم الدم ؟
إذا كان مافيش فايده ..
وفيه عايده !!
أوبرا .. لانعرفها ولانحسّها !!
ولا احنا أصلاً من بقية أهلها !!
تتغنّى عند السفح ف الاهرام !!
ونستخبّى نغنّى فى الحمّام !!
أصل الغنا بالحق فعل قبيح
أنا اكتفيت بالغمز والتلقيح
عايز تغنِّى .. إنت حُر .. اولَع
جايلك نصيبَك ..
ياللا .. كُل .. واشبع
يكفينا شر الزقزقه بالحَق .
أنا ياحبيبتى ب اغنّى .. جوّه الشَق
والشَق أوسع يامَه من بَلَدى
مستنى تُهمَه … بالغُنا العَمدى !!!!
مع سبق إصرار النايات ع البُكا !!!!
جريمه أبشع من كلام يتحكى
إزعاج لعايده وهيّا ب تسرسَع
ح اقطع لسانى عندها وارجع
أكتب ب نَزفُه : الظلم مش مكتوب
الطير يحوّم عند كل غروب
يلاقى ناس حافيه بتستناه
مقطوع لسانها .. ب تحدفُه ب الطوب !!!
التعليقات مغلقة.