اياكَ و الفرط في الثقة
أسـمـاء الـبـيـطـار
كتير من المشاكل اللي حصلت للولاد في مرحلة البلوغ ثم مرحلة الشباب و هي من اخطر المراحل اللي بيمر بيها الولد و البنت هي فرط الثقة من الأهل و ترك حبلها على الغارب زي ما بنقول كتير من مشاكل الإدمان و الزواج العرفي و التمادي في العلاقات الخاطئة بين الولاد و البنات اساسها فرط الثقة
كتير من المشاكل اللي زعزعت إيمان البعض خصوصًا البنات و بالتحديد في قضية خلع الحجاب هي فرط الثقة و ترك حبل اختيار الأصدقاء على الغارب .
صحيح الأهل ربوا و تعبوا وغرسوا و لكنهم لم يهتموا نعم كما قرأتها لم تهتموا بييجي الأب أو الأم يقولوا بعد كل اللي عملناه يبقى ده جَزاءنا .
و كما تعودتم مني اسمحوا لي بتجربة شخصية مع ابني الكبير بما إنه في نفس المرحلة .
إحنا متعودين لما حد من الولاد يخرج يبقى في ساعة هينزل فيها و ساعة هيرجع فيها يعني الوقت مش مفتوح وقت ما يخلص يرجع .
المهم ابني خرج و قال هرجع الساعة عشرة .
فأنا خلاص زي ما متعودة عشرة يعني عشرة المهم الولد اتأخر لعشرة و نص فلما رجع و سألته ايه اللي اخرك كده قال ما حضرتك ما سألتيش عليا !!
يعني ما اتصلتش بيه و هنا فهمت من الولد إن دا عدم اهتمام مني
بيه و المفروض إني من وقت للتاني اتصل بيه .
و قد كان
مش عيب إننا نفهمهم بالذات في المرحلة دي اكتر مرحلة بيمر بيها الولاد محتاجة لاحتواء و صداقة و اهتمام لطيف يعني مش ضغط و مش فرط .
مش عيب إنهم يعلمونا حاجة المهم إننا نهتم باللي اتعلمناه .
التعليقات مغلقة.