أيوب الهوي… شعر/ أشرف الشناوي
انا قلبي داب م الهوي
وعملتي بيه خلخال
ماكفايه قسوه ووجع
يام العيون والشال
الرحمه يوم والنبي
ماتردي عالمرسال
أيوب عليل والدوا
نظره تكون في الحال
ماتخفي ايدك بقي
م الهز في الغربال
لو ضحكه تحيي المني
وتعدل الأحوال
قلبي اللي داب انكسر
وماعدش يسوي ريال
زفوه عيال البلد
عريان بلا سروال
لا قلب حن عليه
ولا بص عالموجوع
يوصل نهاره بليل
عايم في بحر دموع
يحلم بحبة هنا
او حضن من دا الجوع
يرمي الحبال للقمر
يرجع بمية موضوع
يلمح خيال في الفضا
يتشعبط المخدوع
ويفوق يلاقي الامل
واقف وفي الممنوع
فيشد تاني الغطا
ويصلي بكل خشوع
التعليقات مغلقة.