إبعد حبالك…شعر حسين بدراوي البيومي
إوقد يادمعي كومين ألم
وإكتب يا حبر بحور عُرب
وإرمي الشبك جوا السجون
الليل باعتلي كتير ظنون
بتسطر ال حبة ساعات
متمخترة بين الشقوق
وإكمني طفل بيجذبه
قاع الهموم
فانا صعب أفوق
إبعد حبالك يا زمن
إعفيني تفسير الدليل
وابعت لأمي قبلتي
قبل الفوات
أنا مت زي غريق هوى
عديت ف بوابة العدم
شايل سراب
دفيان ف حفرة لكنها بطعم العذاب
عقلي اللي بات
ف أربع ليالي منفدين على بعضهم
مش عارف الليل م النهار
شجعت فكرة لإنكسار
وأنا مُنتصِر
رافض حبالك يا وطن
و أنا لسا بتنفس لكني
بعقل مات
طب لو ضحيت على حسها من تاني
وإتعادت حياه
إزاي هعيش
وأنا جوا عقلي خلاص مفيش
غير الظلام
إبعد حبالك يا قلق
خليني أكلم ف الفلق
وأوصف لكم شكل الظلام
الصبح لنهايتي شرق
وأنا بين إيدين اللي خلق
التعليقات مغلقة.