إثبات نسب بقلم معوض حلمي
أنا فـرع لأصـولي
وجدودي غاليين الحسب
مـن كـام ألـف عــام
بازرع غيطانك قصب
وجيتلك طالب رقم قومي
ماملكـش غير حبـة عـرق
قالوا لي ناقصك في الـورق
إثبات نسب
نفس الحكايه بشحمها وبلحمها
نفس الصور بيشر منه دمها
شيخ الغفر والعمده والدوار
والحاشيه باقيه والزمن دوار
شيخ البلد بيوزع الأدوار
أنفـار بتصـحى للشـقى
رجليـها حافيه مشققه
والشمس لسه مشقشقه
عايشين كفاف اللقمه حاف
والضحك خاف
ساب الشفايف مرعوشين
ولاعاد أمان ، ولا عاد حنين
ولا عاد دفا
بيدفي جيب المطحونين
رغم العرق نازل يرخ
شيخ الغفر لو نادى بخ
يبقي لازما ياجدع
م الـخـوف تـنـخ
لو جه يخبط ع البيبان
ومعاه بيان بالممنوعات
أولها تلتزم السكات
تقفل عيونك والودان
وجاب وراه سرب الغفر
ضهر وسند
واللسته مليانه حكايات
مالهاش عدد
وانت النفر واقف بطولك
في الخلا محتاج مدد
محتاج نبي
يملك حلول المعضلات
يحل عقده للبنات
ويداوي شيب الصبي
يفك لغز الأحجيات
ويزهق الفكر الغبي
ويزهق الفكر الغبي
التعليقات مغلقة.