إختبار بقلم أحمد شاهين
إعرب إللى تحته خط
مركبى مش لاقى شط
مجدافينى من هموم
ع الدموع بصحّا وأقوم
نفسى بس أفرح فى يوم
فرحه تيجى بالغلط
إعرب إللى تحته خط
هات مرادف ليا انا
شخص ما حس بهّنا
عمره ضاع منذ الطفولة
بس عاش معنى الرجوله
مِن وهو فى سنه أولى
حسّ عمره ١٠٠ سنه
هات مرادف ليا انا
أكمل الجمله بشئ
فجأه بيضيع الطريق
الأمل يصبح سراب
يغٌدروا حتى الصِحُاب
لما سهم الغدر صاب
إنجرح قلبى البرئ
أكمل الجمله بشئ
إستخرج م الجمله ضمير
فى الدنيا مش لاقى ضمير
غِش وكِدب وبحر خداع
وإللى أمِنته الأخر باع
دٌنيا وبتبدِل أوضاع
وإزاى بس تلاقى الخير
إستخرج م الجمله ضمير
إستخرج فعل مضارع
راح فين الفجر الطالع
عينى ليه مش بتشوفه
إيدى مش لاقيه كفوفه
ربك أعلم بظروفه
يمكن راح ومأهوش راجع
إستخرج فعل مضارع
يلا قطعه إملائيه
بس تتكلم عليا
إحكى عنى وعن حياتى
ع اللى أصبحوا ذكرياتى
ع اللى راح ولا عمره أتى
وإللى إخترعوا الأسيه
يلا
قطعه
إملائيه
التعليقات مغلقة.