إرجَع بقَه شعر منى عبدالرحمن

وَطَني الحَبيب
وَحَشتِني
وَحَشْنِي فِيك العَدل والإنْصَاف
وبَقِيت بَخَاف
مِن كُل كِلمَة قُلْتَها وبَاقُولها لِيك
وحيَاة عنِيك
أنا مِن قَساوِة كِلمِتَك مابَقيت بَنام
طَب مُش حَرام؟
إنتَ تِنام
وتعيش فِ قَصرَك وِسط نَصرَك مُرتَوي
وانا بالأوي
إن قُلت آااه
عَليَّا يِتْحَرَّم كَلام
حَتىٰ البُكا مِستَكتَرُه
والصَّمْت عارِف مَصدَرُه
خُوفي مِن الوِحدَة مابين قُضبان جَفاك
قُلتِلَك مِسْتَنِّياك
تِرجَع بِفجرَك والنَّهار
والشَّمس حَارسَة سِكِّتَك
والنُّور مزَيِّن طَلِّتَك
وانا ماشية داخِل أورِدَة
مُتأكِّدَة
مِن حُضن مَاليان ألْف دَار
فَاتحَة بِيبَانْها عَ الأمَل
وانا وبخَجَل
فاتْحَة إيديَّا وبَحضُنك
أنا موْطِنَك
وعَشان عِنيك مِتحَمِّلَة ١٠٠ألف نار
وَطَني الحَبيب
إرجَع بَقه
وَحشتِني