إعتذار .بقلم.محمد سيوفى
متقدميش أى إعتذار
ولا أسف ولا يحزنون
أنا حبى ليكى كان قرار
دفعت تمنه وبجنون
جنبت عقلى م الحساب
ومشيت ورا حلم كان سراب
ساقيتى قلبى كاس عذاب
كان فاكره شهد م العيون
وفرى الدمع ف عنيكى
العيب مؤكد مش عليكى
العيب على قلب كان شاريكى
وكان حالف يخلص يصون
بلاش نفتح ف إللي فات
ونصحى جرح وذكريات
خلي فراقنا من سكات
متأكديش عندى الظنون
لساكى فى القسوه جريئه
بتبدلى حروف الحقيقه
وترسمى الدمعه البريئه
وتخدعى القلب الحنون
نزلت في روايتى الستار
وحفظت دورك بإقتدار
وإتبدل الليل بالنهار
وترياقى من سمك يهون
على كل حال وصل الجميل
وأنا صابر الصبر الجميل
ده مهما كان الليل طويل
شمس النهار حتماً تكون
التعليقات مغلقة.