إقرصي وداني
بقلم ؛ الفلاح الفصيح معوض حلمي منشأة بطاش تمي الأمديد
دقهلية
……………………………
أول كلامي بسم … الله
تقلب حرنا ……….. ضله
وطول العمر لينا حجاب
يداوي الآهه ……. والعله
قومي يامه وارقي شادي
زي جدو وجدو منك
زي ورد الصبح نادي
بكره يكتب زيي …. عنك
عدت سنينك زي بسمه
بس سابت فيا …. شي
روحي طايره زي نسمه
راسمه خيط الضلمه ضي
والحنان مش …. بالعلام
والمظاهر بس ….. نزوه
والمحبه ……….. بالهيام
والأمومه كيان وعزوه
مدي إيدك …….. لملمينا
حضنك الطيب ….. أمان
أدبينا …………. وعلمينا
قسوتك جنة ……..حنان
إقرصي وداني بضوافرك
إجرحي وسيبي علامه
عمري يامه مانسى فضلك
حتى جرحك فيا هامه
شالت إبني في حضنها
وامي لسه جنه طارحه
وابن إبني في حجرها
على حسها نايم بفرحه
واخده حس الدار حبيبتي
ولسه بتعاتب ….. غيابي
بعد سهري وبعد غيبتي
قاعده صاحيه حارسه بابي
لما انادي واقول عيالي
وقت مابتزيد … جراحي
يعلى صوتها تقول ياغالي
ليه تنادي وقلبي صاحي
وقت تعبي كنت أشوفك
والرجا ملو …… العيون
والدموع شقيين خدودك
زي نهر بيروي كون
ليه تداري عني دمعك
فاكره يامه ابنك اناني
نبضي واصل نبض قلبك
وقلبي سامعك لو تعاني
هدى سور الخوف وعدي
شدي عودك ماتناميش
إفردي قلوعك …. ومدي
ضهري شطك متخافيش
بين سكوتك 100 حياه
والزمن واقف … حداكي
دعوتك في الشده جاه
سمعيني صوت … نداكي
ماتقوليش العمر … فات
لسه يامه الفجر جاي
إضحكي وهدي السكات
ضحكتك في الحر في
إشحني بحبك مشاعري
وابدري في قلبي حنانك
تطرح الأفراح في عمري
واكتب الأشعار عشانك
سيبتي فينا العزة منك
ياللي حمدك كان عباده
ولامره يامه شاكيتي همك
كنتي واحه ….. للسعاده
كنتي واحه ….. للسعاده
التعليقات مغلقة.