إلى أُمى…
شعر السيد الشيتى
إلى أُمى… شعر السيد الشيتى
أمى إل ساكن
في شرايينى نداها
مازلت بحلم بيها
بتنفس رضاها
انا بحمد الله
ال علمنى ابوس ايدها
وعشت العمر احلم
إني اسعدها
هي الوحيده إل حبتنى
بدون ماتنتظر منى
فضلت الطفل ف عنيها
لغاية ماكبر سنى
انا كنت لما انوى السفر
تبكى لى وتدارى دموعها
ولما ارجع احس بأني طفل
مابين ضلوعها
زمان ماكانش ف الدنيا
غير الجوابات
وليل الغربه كان آسي
عذاب وسكات
وكنت افرح وانا بكتب لها
بقلبى ال ساكنه فيه
وتستني كأن مريض
بيستنى الدوا يشفيه
دانا ياامه ال كنت مريض
ومستنى دواكى
حياتى ف دنيتك جنه
بيرويها رضاكي
ياأول صوت بصوت الحب نادانى
وأول قلب حَب الدنيا علشانى
انا معاكي نسيت الظلم والأحزان
وشفت الرحمه ف عنيكي
وحسيت إن أنا إنسان
بحبك آه.. ودا معناه
اعيش العمر أدعيلك
وأقول لاولادى احكي لهم مواويلك
كبرت إزاى وخدت نهارى من ليلك
وقيدتى شمعتى بأيدك
طفيتى كل قناديلك
دا لو شيلتك على اكتافي
أطوف بيكي
وجبت من السما نجمه
تنورلك لياليكي
اكون قصرت مش ممكن أجازيكي
دا رب العرش من كرمه معليكى
مخلى الجنه ياأمى
نعيمها تحت رجليكى
ولما تعبتي ياامى وشوفت الموت حواليكى
نسيت نفسى ونامت إيدى ف ايديكى
وهَدّيتك سألت المولى يشفيكى
شريط العمر ياعمرى
ساعتها شوفته ف عنيكى
لقيت العمر من عمرى بيتسرب
وقلبى يدق مش حاسس وبستغرب
وآخر قبله ياامى
طبعتيها علي جبينى
وقولتى بكره نتقابل
يانور عينى
سالت الله اقابلك ياامه ف الجنه
دا قلبى مناه اشوفك تانى واتهنى
التعليقات مغلقة.