إلى السير / مجدي يعقوب
الشاعر بكري جابر
…….
أنت مين ياعم ياللي من شعاع الضي نور ؟!
يا عود بخور معجون من تراب الاوليا
جواك حياة
مش من هنا
روحك ملك
داير توزع ع البيوت بسمة أمل
حبة ندي
إيد بتعزف للعباد
لحن الوجود
يامنتهى وحي الرسايل كلها
طيف المنى جاي من بعيد
روح الحسين
القديسين
السيدة
قلب المسيح
العدرا نور
عشق العيال الطيبة لحظة سجودك للإله
ركعة بتوصيل للسما من غير حدود
من غير تابوت
لون .. أو .. هوى
قلبك دوا
يامشتهى كل القلوب المتعبة
الشوق نديم
يعقوب بيبكي ع العيال لما تغيب
يعقوب ده أكبر من فروض الإحتمال
رحال و داير ف الخلا
فوق كتافُه ألف حب
ناي حنين
درويش وضوؤه من دموع المرحمة
لما الزهور تتهجي الحياة
والرحمة دين
أنت ابن مين …؟!
ياعم يا للي خليت الحياة عودين ريحان
كشفت تجار البشر
قلبك بشر والا أنت إيه … ؟!
عِجز الكلام
كل البلاغة اتحجرت قدام عينيك
لما انحيت …
عرف البشر معنى الشموخ
يا ميت عطوف
داير تطبطب ع البنات
سكر نبات
دموع حارتنا الطيبة اما تتوه
سبحانُه من خلاك ملك
قلب طِيبة الطيبة
عدى البراح
ما تقولي إيه معنى البراح
غير قلب فيه وش السما
شجرة تضلل ع الطريق ؟!
قدرك
نصيب
تشفي الوجع
تصب لينا كأس حياة
لا يوم قايضت على الألم
و لا يوم تاجرت بالدموع
يااااه ع الجدع
لما يكون قلب البشر …
قلب حب
عشقه رب
كاس الدوا
مركب نجاة
التعليقات مغلقة.