إنتحار قصيدة بقلم الشاعر محمد عبد الفضيل
يا شعر طقت في راسي
أهجر سماك والاراضي
هتقول علي إني قاسي
تلاقاني صابر وراضي
إيه اللي جالي مكاسب
من كلمة جرا في كلمة
م الكسر بضبط وحاسب
لاغلط في فتحة وضمة
بطلت أقول لك قصايد
بطلت اكون مشتاق
كان إيه علي اللي عايد
حزن ومرارة وفراق
بطلت اقول في المجالس
إن المحبة خضار
شوف عنتر أبو الفوارس
الحب جاب له دمار
تتساوي يا غش بينا
مع إني بالصدق فارس
حافظ كتابي في دينا
قاري وفاهم ودارس
الكدب شيمة وشايع
واهل الادب داقو منه
شاعر لصاحبه وبايع
ولا نفعه يوم حسن ظنه
الخسة سلعة ورايجة
سوقها بيضرب علالي
يا ما ناس كتير بيها عايقة
والطيبة ليه موصوفالي
هذا الاديب الفلاني
كله بيلحس عتابه
لو كح يلقي التهاني
تطبيل وهيصه لجنابه
كاس الندالة وغطاه
للي ينافق فلان
وآهو بكره يديه قفاه
ولا يلقي صدق وأمان
يرحم حروف اللي قالو
من قبل مني وغنو
الناس عن الشعر مالو
ولا مرة رجعو وحنو
ماتت حروفي وقصيدتي
في عز نشوة شبابها
ببارود جنابك نسفتي
وقفلتي في الوش بابها
وقصيدتي شربت نقيعها
كوكتيل سموم من أفاعي
ولا نجدة تنفع تجيلها
ولا حتي ينفع رفاعي
التعليقات مغلقة.